Qyrǵyzstan prezıdenti koronavırýspen kúrestegi OA elderiniń ózara is-qımylyn jaqsartýdy usyndy
TÚRІKMENBAShY. QazAqparat – Qyrǵyzstan prezıdenti Sadyr Japarov Túrkimenstannyń Túrikmenbashy qalasynda ótken Ortalyq Azııa memleketter basshylarynyń Konsýltatıvtik kezdesýinde sóılegen sózinde Ortalyq Azııa elderiniń koronavırýs ınfektsııasymen kúrestegi ózara is-qımylyn jaqsartý boıynsha birqatar usynys aıtty, dep habarlaıdy QazAqparat Kabar agenttigine silteme jasap.
Sadyr Japarov pandemııamen kúres jónindegi jumystyń mańyzdy aspektisi pandemııaǵa, eń aldymen Eýrazııalyq ekonomıkalyq odaq jáne Táýelsiz Memleketter Dostastyǵy elderimen den qoıý jónindegi halyqaralyq ózara is-qımyldy nyǵaıtý jáne keńeıtý bolǵanyn atap ótti.
Osyǵan baılanysty Sadyr Japarov erekshe nazar aýdarýdy talap etetin ózara is-qımyldy jaqsartý boıynsha birqatar usynys aıtty. Atap aıtqanda, bul – vaktsınatsııa máseleleri.
«Qyrǵyz tarapy kórshi elderdiń dástúrli medıtsına ortalyqtaryn qurý týraly, sondaı-aq densaýlyq saqtaý júıeleri arasyndaǵy, onyń ishinde medıtsınany, telemedıtsınany tsıfrlandyrý, zerthanalar salý, kadrlar daıarlaý jáne qoǵamdyq densaýlyq saqtaýdyń joǵary tıimdi jáne qýatty júıesin birlesip qurý úshin aqparat almasý salasyndaǵy ǵylymı-praktıkalyq yntymaqtastyqty odan ári damytý bastamalaryn qoldaıdy. Sondaı-aq, test nátıjelerin, COVID-19 vaktsınatsııasynyń sertıfıkattaryn nemese tólqujattaryn ózara taný máselelerin sheshý qajet», - dedi Qyrǵyzstan prezıdenti.
Qyrǵyzstan basshysy sonymen qatar qyrǵyz tarapynyń kelesi Konsýltatıvtik kezdesýdi 2022 jyly Qyrǵyz Respýblıkasynda ótkizýge daıyn ekenin atap ótti.
