Qyrǵyzstan Prezıdenti «Qomyz kúnin» bekitti
BІShKEK. QazAqparat – Qyrǵyz Respýblıkasynyń Prezıdenti Sooronbaı Jeenbekov «Qomyz kúnin» bekitý týraly Qaýlyǵa qol qoıdy, dep habarlaıdy QazAqparat atalmysh el basshysynyń resmı saıtyna silteme jasap.
Qaýlyda atap ótilgendeı, dástúrli mýzykany qyrǵyz halqynyń rýhanı mádenıetiniń ajyramas bóligi retinde qomyzsyz elestetý múmkin emes.
«Qazirgi tańda qomyz jańa mán-mańyzǵa ıe bolýy qajet. Ol qyrǵyzstandyqtardyń mádenı alýantúrliliginiń birligi sımvolyna aınalýy tıis... Osy rette, Qyrǵyzstannyń etnıkalyq birlestikteriniń mádenıetaralyq dıalogyn keńeıtý úshin dástúrli mýzykanyń rólin kúsheıtý kerek», - delingen qujatta.
Atalǵan baǵytta tıisti jumystar júrgizý úshin Qyrǵyz Prezıdenti el Úkimetine 9 qyrkúıekti jyl saıyn atalyp ótetin Qomyz kúni retinde bekitýdi usynatyn qaýlyǵa qol qoıdy.
Qaýly jarııalanǵan kúnnen bastap kúshine enedi.
Qyrǵyz halqynyń aǵashtan jasalatyn úsh ishekti, pernesiz, shertip oınalatyn ulttyq mýzykalyq aspaby.
