Qyrǵyzstan prezıdenti qazaqstandyqtardy Astananyń 20 jyldyǵymen quttyqtady
ASTANA. QazAqparat - Qyrǵyzstan prezıdenti Sooronbaı Jeenbekov qazaqstandyqtardy Astananyń mereıtoıymen quttyqtady. Qyrǵyzstan basshysynyń vıdeoquttyqtaýyn Qazaqstan Prezıdentiniń Teleradıokesheni jarııalady, dep habarlaıdy «QazAqparat» HAA tilshisi.
«Sizderdi baýyrlas Qazaqstannyń dańqty elordasy - Astananyń mereıtoıymen shyn júrekten quttyqtaımyn. Astana - bizge týysqan memlekettiń saıası jáne ekonomıkalyq jetistikteriniń qalasy. Ol eldiń artyp kele jatqan qýaty men bolashaqtaǵy órkendeý áleýetin kórsetedi», - dedi Sooronbaı Jeenbekov.
Qyrǵyz Respýblıkasynyń basshysy Astananyń damýy táýelsiz Qazaqstannyń qalyptasý tarıhynyń quramdas bóligi ekenin atap kórsetti.
«Astana aldaǵy ýaqytta da táýelsiz Qazaqstannyń, onyń kópultty halqynyń birliginiń, jasampazdyq kúsh-qýatynyń sımvoly retinde damı bersin, gúldene tússin. Týysqan Qazaqstan halqyna amandyq, beıbitshilik jáne gúldený tileımin», - dedi ol.
