Qyrǵyzstan Prezıdenti Qazaqstandy mańyzdy seriktes dep atady

BІShKEK. QazAqparat - Búgin Qyrǵyzstannyń prezıdenti Sooronbaı Jeenbekov Joǵarǵy keńestiń otyrysy kezinde otandastaryna arnaǵan joldaýynda eldiń syrtqy saıasatyndaǵy basym baǵyttardy  aıqyndady, dep habarlaıdy QazAqparattyń menshikti tilshisi. 

«Qazaqstan, Ózbekstan, Tájikstan jáne Túrikmenstan syndy kórshiles eldermen dostyq qarym-qatynasty nyǵaıtý halqymyzdyń jaǵdaıyna oń áserin tıgizedi. Biz muny syrtqy saıasattyń basym baǵyttarynyń biri retinde baǵalaımyz», - dedi S.Jeenbekov.

Qyrǵyzstannyń strategııalyq seriktesi jáne odaqtasy Reseımen jan-jaqty baılanysty damytýy - syrtqy saıasattaǵy tapjylmas basymdyǵy bolyp sanalady. Sondaı-aq, kórshiles Qytaı Halyq Respýblıkasymen ornaǵan aradaǵy qarym-qatynas strategııalyq deńgeıge kóterilgen.

«Túrkııa, Japonııa, Koreıa, AQSh, Eýroodaqqa múshe elder, sondaı-aq, arab elderimen ekijaqty jáne kópjaqty qarym-qatynasty odan ári nyǵaıtamyz», - dedi Qyrǵyz Respýblıkasynyń Prezıdenti.

Sondaı-aq, el prezıdenti Qyrǵyzstannyń EAEO-ǵa múshe bolýynyń mańyzdylyǵyn erekshe atap ótti.

«Biz Qyrǵyzstannyń taýarlaryn álemdik naryqqa eksporttaý úshin bar múmkindikti paıdalanýǵa tıispiz. Eldiń tranzıttik jáne óndiristik áleýetin odan ári damytamyz», - dedi óz sózinde S.Jeenbekov.