Qyrǵyzstan prezıdenti: Qazaq-qyrǵyz qatynastaryn damytýda Nursultan Nazarbaevtyń róli erekshe

NUR-SULTAN. QazAqparat - Qazaqstannyń Tuńǵysh Prezıdenti Nursultan Nazarbaev Qyrǵyz Respýblıkasynyń Prezıdenti Sadyr Japarovpen telefon arqyly sóılesti, dep habarlaıdy QazAqparat Elbasynyń resmı saıtyna silteme jasap.

Qyrǵyzstan Prezıdenti Nursultan Nazarbaevty shyn júrekten týǵan kúnimen quttyqtap, myqty densaýlyq, baq-bereke jáne kópqyrly memlekettik qyzmette jańa jetistikter tiledi.

Sadyr Japarov qazirgi qazaq-qyrǵyz qatynastaryn, sondaı-aq ekijaqty strategııalyq seriktestik pen odaqtastyqty damytýdaǵy Nursultan Nazarbaev qyzmetiniń erekshe mańyzdylyǵyn atap ótti.

Qazaqstannyń Tuńǵysh Prezıdenti Qyrǵyz eliniń kóshbasshysyna izgi tilekteri úshin rızashylyǵyn bildirip, baýyrlas eki el arasyndaǵy tarıhı tyǵyz baılanystardyń odan ári keńeıip, tereńdeı túsetinine senim bildirdi.