Qyrǵyzstan prezıdenti eldegi jaǵdaıǵa baılanysty halyqqa úndeý joldady
BІShKEK. QazAqparat - Qyrǵyzstan prezıdenti Sooronbaı Jeenbekov eldegi jaǵdaıǵa baılanysty málimdeme jasady, dep habarlaıdy QazAqparat Kabar agenttigine silteme jasap.
Prezıdent apparatynyń aqparattyq saıasat bóliminiń málimetinshe, úndeýde birqatar máseleler qamtylǵan. QazAqparat málimdemeniń mátinin jarııalaıdy.
«Qurmetti otandastar!
Keı saıasatkerlerdiń shekten tys keýdemsoqtyǵynyń kesirinen bizdiń azamattardyń beıbit tirshiligi men el tynyshtyǵyna qaýip tóndi.
Saıası urandarmen qatar, eldiń birligi men qoǵamnyń tynysh ómirin buzýǵa shaqyratyn provokatsııalyq úndeýler de boldy.
Qyrǵyzstan qaýip-qater sheginde tur.
Qymbatty qyrǵyzstandyqtar, halqymyzdyń beıbit tirshiligi saıası oıynnyń qurbanyna aınalmaýy tıis. Mine, sol úshin el astanasy Bishkekte tótenshe jaǵdaı rejımi engizildi.
Búgin men sol týraly tıisti jarlyqqa qol qoıdym.
Konstıtýtsııalyq quziretimniń aıasynda men azamattardyń tynysh ómiri men eldiń birtutastyǵyn saqtaý úshin qolymnan kelgenniń bárin jasaımyn. Eldiń búkil deni saý kúshi meni tolyq qoldaıdy dep senemin. Búgin biz memlekettigimizge shynaıy qater tóngenin kórip otyrmyz. Sondyqtan shette qur qarap turmaı, osy qıyn kúnderden birge shyǵaıyq.
Jaratqan halqymyzǵa jáne súıikti Qyrǵyzstanymyzǵa jar bolsyn».
