Qyrǵyzstan prezıdenti Bishkekte qaıtadan tótenshe jaǵdaı rejimin jarııalady
BІShKEK. KABAR-QazAqparat – Qyrǵyzstan prezıdenti Sooronbaı Jeenbekov Bishkek qalasynyń aýmaǵynda tótenshe jaǵdaı rejımin qaıtadan engizý týraly Jarlyqqa qol qoıdy. Bul týraly QazAqparat Qyrǵyzstannyń Kabar agenttigine silteme jasap habarlaıdy.
Atalǵan sheshimniń shyǵarylýyna Jogorký Keńeshtiń úsh kúnniń ishinde el astanasynyń aýmaǵynda buǵan deıin tótenshe jaǵdaı rejımin engizý týraly máseleni qarastyrmaǵany sebep boldy.
«Jappaı tártipsizdikter nátıjesinde týyndaǵan zorlyq-zombylyqpen jáne adamdardyń ómiri men densaýlyǵyna qater tóndirýmen ushtasatyn qalyptasqan jaǵdaıǵa baılanysty, sondaı-aq Qyrǵyz Respýblıkasy Konstıtýtsııasynyń 15-babyna, 64-baby 9-bóliginiń 2-tarmaǵyna jáne «Tótenshe jaǵdaı týraly» Qyrǵyz Respýblıkasy Konstıtýtsııalyq Zańynyń 3, 4, 7, 8-baptaryna sáıkes azamattardyń ómiri men densaýlyǵyn, olardyń qaýipsizdigin qorǵaýdy qamtamasyz etý múddesinde, budan bólek, Bishkek qalasynyń aýmaǵynda qoǵamdyq tártipti qamtamasyz etý maqsatynda:
Qyrǵyz Respýblıkasy Bishkek qalasynyń aýmaǵynda 2020 jylǵy 12 qazanda saǵat 20.00-den 2020 jylǵy 19 qazanda saǵat 07.00-ge deıin tótenshe jaǵdaı engiziledi», delingen qujatta.
Qyrǵyz Respýblıkasy Іshki ister mınıstriniń orynbasary Almazbek Qydyrbaıuly Orozalıev Bishkek qalasynyń tótenshe jaǵdaı kezeńindegi komendanty bolyp taǵaıyndaldy.
Qyrǵyz Respýblıkasy Bishkek qalasynyń aýmaǵynda tótenshe jaǵdaı rejımin qamtamasyz etý úshin komendatýra qurylyp, Bishkek qalasynyń komendatýrasy týraly ereje qosymshaǵa sáıkes bekitildi.
Eske sala ketsek, 9 qazanda Bishkek qalasynyń aýmaǵynda tótenshe jaǵdaı rejımi engizildi. Ol rejım 21 qazan saǵat 08.00-ge deıin sozylýy kerek bolatyn.
