Qyrǵyzstan prezıdenti apparatynyń jetekshisi otandastarynan qylmysqa qarsy kúreste qoldaý bildirýlerin ótindi
BІShKEK. 7 aqpan. QazAqparat /Arnur Rahymbekov/ - Búgin Qyrǵyzstan Respýblıkasy prezıdentiniń baspasóz qyzmeti prezıdent ákimshiligi apparatynyń jetekshisi Emilbek Qaptaǵaevtyń úndeýiniń mátinin jarııalady.
Otandastaryna arnalǵan úndeýde búgingi tańda Qyrǵyzstanda uıymdasqan qylmys memlekettiń barlyq salasyna boı suǵa otyryp, ýshyqqan jaǵdaıǵa jetkeni aıtylǵan.
«Elimiz úshin osy qıyn kezeńde el prezdenti Roza Otynbaevanyń uıymdasqyn qylmys pen qaraqshylyqqa qarsy júrgizip otyrǵan saıasatyna qoldaý bildirýlerińizdi suraımyn. Biz Qyrǵyzstannyń árbir azamatynyń qaýipsizdigi qamtamasyz etilmeıinshe, el damýynyń bolashaǵy jaıly sóz bastaýǵa da bolmaıtyndyǵyn túsinemiz. Qyrǵyzstan aýmaǵyndaǵy árbir azamattyń ómirin qaýipsizdikpen qamtamasyz etý maqsatynda biz búgin qylmys pen qaraqshylyqqa qarsy jan-jaqty soǵys jarııaladyq», -dep málimdegen E.Qaptaǵaev.
Qyrǵyzstan ІІM málimetinshe, el ishinde birneshe iri uıymdasqan qylmystyq toptar qolǵa túse bastaǵan. Sondaı-aq qyrǵyz qylmyskerleri Qazaqstanda da quryqtalyp jatyr. Mysalǵa, 31 qańtar kúni Almaty oblysy Talǵar qalasyndaǵy psıhıkalyq densaýlyq jáne saýyqtyrý ortalyǵynda polıtseıler birneshe qylmys jasap, halyqaralyq izdeýde júrgen Zaýr Magomedov atty Qyrǵyzstan azamatyn qolǵa túsirgen.
