Qyrǵyzstan prezıdenti 1-2 mamyrdy aza tutý kúnderi dep jarııalady
BІShKEK. Kabar- QazAqparat – Qyrǵyzstan prezıdenti Sadyr Japarov Qyrǵyzstan respýblıkasynda 1-2 mamyr kúnderin ulttyq aza tutý kúnderi jarııalanǵan Jarlyqqa qol qoıdy. Bul týraly QazAqparat Kabar aqparattyq agenttigine silteme jasap habarlaıdy.
29-30 sáýir kúnderi Batken oblysyndaǵy qyrǵyz-tájik shekarasyndaǵy qarýly qaqtyǵys saldarynan kóp adam qaza taýyp, zardap shekken. Olardyń arasynda beıbit turǵyndar da, áskerı qyzmetkerler de bar. Qarýly qaqtyǵys saldarynan beıbit turǵyndardyń jáne zańdy tulǵalardyń múligi aıtarlyqtaı zaqymdalǵan.
«Osylaısha, qaza bolǵandardyń týystary men jaqyndaryna qaıǵyryp kóńil aıtamyn jáne qaýly etemin:
- Qyrǵyzstan Respýblıkasynda 2021 jyldyń 1 jáne 2 mamyr kúnderin ulttyq aza tutý kúnderi etip jarııalansyn;
- Ulttyq aza tutý kúnderi eldiń búkil aýmaǵynda, sondaı-aq sheteldegi dıplomatııalyq jáne konsýldyq mekemelerde Qyrǵyzstan Respýblıkasynyń Memlekettik týlary túsirilsin;
- Mádenıet mekemeleri jáne teleradıokompanııalarǵa ulttyq aza tutý kúnderi oıyn-saýyq sharalar men baǵdarlamalardy taratpaý usynylsyn;
- Qyrǵyz Respýblıkasynyń úkimetine jergilikti ózin-ózi basqarý organdarymen birlesip qaza bolǵandardyń otbasylary men zardap shekkenderge kómek kórsetý boıynsha tıisti sharalar qoldanylsyn», - dedi Qyrǵyzstan prezıdenti.
Qyrǵyzstan eliniń Densaýlyq saqtaý mınıstrliginiń sońǵy málimeti boıynsha, qarýly qaqtyǵys saldarynan 31 adam qaza taýyp, 154 adam zardap shekken.
