Qyrǵyzstan premeri otstavkaǵa ótinish berdi
ASTANA. QazAqparat - Qyrǵyzstan premer-mınıstri Sooronbaı Jeenbekov otstavkaǵa ótinish berdi. Bul týraly ol búgin úkimet otyrysynda málimdedi, dep habarlaıdy Kabar.
«Meniń otstavkaǵa ketýim prezıdenttik saılaýǵa qatysýyma baılanysty. Búgin tústen keıin men Qyrǵyzstan prezıdenti Almazbek Atambaevtyń atyna otstavkaǵa ketý týraly ótinish jazamyn», dedi ol.
Sondaı-aq Jeenbekov ózi basshylyq etken ýaqytta úkimet alǵa qoıylǵan mindetterdi oryndaǵanyn málimdedi. Ol «mınıstrler kabıneti saıası protsesterge aralaspaı, tek qana ekonomıkamen aınalysqanyn» atap ótti.
Eske sala keteıik, búgin Qyrǵyzstannyń Ortalyq saılaý komıssııasy Jeenbekovti prezıdent laýazymyna úmitker retinde tirkedi. Ol saılaýǵa Qyrǵyzstannyń sotsıal-demokratııalyq partııasynyń atynan qatysady.
Qyrǵyz Respýblıkasyndaǵy prezıdent saılaýy 2017 jyldyń 15 qazanynda ótedi.
