Qyrǵyzstan Premeri: «Boıng 737» ushaǵy apatynan opat bolǵandar joq (FOTO)
BІShKEK. QazAqparat - Osh áýejaıynda avıalaınerdiń apatty jaǵdaıda qonýyna qolaısyz aýa raıy sebep bolǵan, dep habarlady jergilikti BAQ Qyrǵyzstan úkimetiniń baspasóz qyzmetine silteme jasap.
Aýa raıynyń qolaısyzdyǵynan ekıpaj ushaqty ekinshi talpynystan soń ǵana qondyra alǵan. Ushaq ushý-qoný jolaǵynan shyǵyp ketken. Onyń qanaty men dóńgelegi isten shyqqan. Ushaq bortynda barlyǵy 159 adam bolǵan.
Eske salaıyq, 22 qarashada Krasnoıarsk-Osh baǵyty boıynsha AVJ 768 reısin oryndaǵan «Avıa Trafık» áýe kompanııasynyń «Boıng 737» ushaǵynyń apatty qonýy kezinde alty adam zardap shekti: aıaǵy aýyr áıel men tórt jolaýshy, sondaı-aq bir ushqysh aýrýhana jetkizildi. Shuǵyl shaqyrylǵan keńes kezinde el premer-mınıstri Temir Sarıev tótenshe jaǵdaıdy tekserý jóninde úkimettik komıssııa qurýdy tapsyrdy. «Osh qalasyndaǵy oqys oqıǵany tekserý nátıjeleri boıynsha jolaýshylarǵa ótemaqy tólenedi», - dedi T.Sarıev.
