Qyrǵyzstan premer-mınıstriniń Reseı Federatsııasyna sapary josparlanyp otyr
BІShKEK. 13 maýsym. QazAqparat - Qyrǵyzstan Respýblıkasy mınıstrler kabınetiniń basshysy Ómirbek Babanov pen Reseı premer-mınıstri Dmıtrıı Medvedev telefon arqyly qyrǵyzstandyq Úkimet basshysynyń Reseıge aldaǵy sapary týraly sóılesti, dep habarlady Qyrǵyzstan mınıstrler kabınetiniń aqparattyq saıasat bóliminen.
Ó.Babanov D.Medvedevti memlekettik mereke - Reseı kúnimen quttyqtap, sondaı-aq óziniń áriptesine qyrǵyz-reseı qarym-qatynastardyń damýyna qosqan jeke úlesi úshin jáne Qyrǵyzstan men Reseı arasyndaǵy ekijaqty, kópjaqty baılanystardy nyǵaıtýǵa jáne keńeıtýge udaıy nazar bóletindigine rızashylyǵyn bildirdi.
Qyrǵyzstandyq premer sondaı-aq aǵymdaǵy jyldyń shilde aıynda Reseıge sapar jasaý usynysy úshin alǵysyn bildirdi. Áńgimelesý barysynda Qyrǵyzstan men Reseı Úkimetteriniń basshylary aldaǵy sapardyń kún tártibin talqylady. Atap aıtqanda, aǵymdaǵy jyldyń shilde aıynda Máskeýdegi qyrǵyzstan-reseı kelissózderin tıimdi ótkizý úshin eki el sarapshylarynyń saparlaryn uıymdastyrý týraly kelisimge qol jetkizildi.
