Qyrǵyzstan Premer-mınıstri ózin prezıdenttiń mindetin atqarýshy retinde jarııalady
BІShKEK. KABAR – QazAqparat – Qyrǵystan Premer-mınıstri Sadyr Japarov ózin prezıdent mindetin atqarýshy retinde jarııalady. Bul týraly ol Úkimet úıi janyndaǵy Eski alańda mıtıngige qatysýshylarmen kezdesý barysynda aıtty, dep habarlaıdy QazAqparat Kabar agenttigine silteme jasap.
«Prezıdent Sooronbaı Jeenbekov otstavkaǵa ketý týraly ótinish jazdy. Jogorký Kenesh spıkeri Qanat Isaev ta prezıdent mindetin atqarýdan bas tartyp, ol da ótinish jazdy. Prezıdenttiń jáne premer-mınıstrdiń quzyreti maǵan ótedi», - dedi Japarov.
Eske salaıyq, búgin, 15 qazan kúni Qyrǵyzstan prezıdenti Sooronbaı Jeenbekov elde qalyptasqan qoǵamdyq-saıası jaǵdaıǵa baılanysty el halqyna úndeý jasady.
Onda ol: «Men úshin Qyrǵyzstandaǵy beıbitshilik, el bútindigi, halqymyzdyń birligi men qoǵamdaǵy tynyshtyq bárinen de joǵary.
Men úshin árbir otandasymnyń ómirinen asqan eshteńe joq.
Men bılikke talaspaımyn. Qyrǵyzstan tarıhynda óz azamattaryna oq jaýdyryp, qan tókkizgen prezıdent retinde qalǵym kelmeıdi.
Sondyqtan men otstavkaǵa ketý jóninde sheshim qabyldadym», - dep atap ótti.
