Qyrǵyzstan Parlamenti boryshkerlerdiń elden shyǵýyn ýaqytsha shekteıtin zańnyń jobasyn maquldady
BІShKEK. Qarashanyń 12-si. QazAqparat /Evgenıı Novıkov/ - Búgin Jogorký Keneshte «Atqarýshy óndiris jáne Qyrǵyz Respýblıkasyndaǵy sot oryndaýshylarynyń mártebesi týraly» Qyrǵyz Respýblıkasynyń Zańyna tolyqtyrýlar engizý týraly» zańnyń jobasy qabyldandy.
Parlamenttiń baspasóz qyzmetiniń aqparaty boıynsha, zań jobasynyń maqsaty qoldanystaǵy zańnamany jetildirý jáne sot oryndaýshylarynyń atqarýshylyq is-qımyldaryn, sondaı-aq boryshkerlerge sottyń sheshimderin májbúrlep oryndatýdyń sharalaryn naqtylaı túsý bolyp tabylady.
Boryshkerlerdiń Qyrǵyzstannan shyǵýyn ýaqytsha shekteıtin normaǵa degen qajettilik, sońǵy kezde boryshtardyń qaıtarylmaýy týraly sotta qaralyp jatqan isterdiń kóbeıýinen týyndap otyr. Bank zaemshylary, kásiporyn boryshkerleri men jekemenshik tulǵalar kóbine boryshtaryn óteýdi mindettegen sot sheshiminen keıin de, Qyrǵyzstannan tys jerlerde qashyp júredi.
Búginde 859 boryshker izdestirilip jatyr.
