Qyrǵyzstan ókimeti bıýdjet qyzmetkerleriniń jalaqylaryn kóterýdiń múmkindikterin qarastyrýda
BІShKEK. 15 jeltoqsan. QazAqparat /Arnur Rahymbekov/ - Bishkekte Qyrǵyz Respýblıkasynyń Prezıdenti Roza Otynbaeva bıýdjet salasy qyzmetkerleriniń jalaqylaryn reformalaý máselesi boıynsha jumys keńesin ótkizdi.
Qazir elde jalaqyny kóterýdi talap etip jatqan orta mektep muǵalimderiniń ereýilderi ótýde. Jumys keńesine Úkimet músheleri, oblystyq ákimshilikterdiń basshylary, Bishkek jáne Osh qalasynyń basshylary, bilim júıesiniń ókilderi qatysty.
Bıýdjet qyzmetkerleriniń jalaqylaryn reformalaý máselesi boıynsha negizgi baıandama jasaǵan Eńbek mınıstri Aıgúl Rysqulova, jalaqyny esepteýdiń búgingi qoldanystaǵy shemasy zamana talaptaryna jaýap bermeıtinin basa aıtyp ótti.
Jalaqyny bir sátte birneshe esege kóterýdi talap etip otyrǵan muǵalimderdiń ótinishterin talqylaý barysynda Qyrǵyz Respýblıkasynyń Qarjy mınıstri Chorobek Imashev, qazirgi ýaqytta respýblıkalyq bıýdjette bul maqsatqa qarastyrylǵan qarajattyń joq ekenin aıtty. «Biraq bizdiń vedomstvo kelesi jyly muǵalimderdiń jalaqylaryn kóterý úshin 1,3 mıllıard som kóleminde qosymsha qarjy izdestirýde. Olardyń jalaqylaryna aı saıyn shamamen 1200 somdaı qosylatyn bolady», - deıdi Qarjy mınıstri.
Prezıdent Roza Otynbaeva sondaı-aq, óz talaptary men ózderin tolǵandyryp otyrǵan problemalary týraly óz aýyzdarymen aıtýǵa kelgen Ystyqkól, Osh jáne Jalalabad oblystarynyń muǵalimderiniń buıymtaılaryn tyńdady.
Muǵalimderdiń, medıtsınalyq jáne áleýmettik qyzmetkerlerdiń, óner qaıratkerleriniń jalaqylarynyń tym tómen ekenin jaqsy biletinin aıtqan Prezıdent: «Biraq, qazirgi tańda memlekettiń bıýdjet adamdarynyń jalaqysyn bir sátte birneshe esege arttyrýǵa shamasy jetpeıtinin moıyndaýymyz kerek. Soǵan qaramastan, biz barsha qyrǵyzstandyqtardy, olar qaı salada eńbek etpesin, laıyqty turmyspen qamtamasyz etý úshin qolymyzdan kelgenniń bárin jasap jatyrmyz», - dedi.
