Qyrǵyzstan mınıstri pavlodarlyq polıtseılerge alǵys joldady
«Hatta júk kóligin tizgindegen Qyrǵyz Respýblıkasy azamatynyń qatty aıazda Shiderti kentiniń mańyndaǵy tas jolda turyp qalǵany, oǵan polıtseılerdiń kómekke kelgeni aıtylǵan. «Polıtsııa podpolkovnıgi Jaqsylyq Baıysbekov, aǵa leıtenanttar Azamat Shaqshabaev pen Rýslan Vereşaktyń adamgershiligi men qyzmetinine degen adaldyǵy adam ómirin qutqarýǵa sebep boldy. Olar ózderine júktelgen mindetterdi abyroımen atqardy» dep atap ótken», - deıdi Nurdildá Oraz mınıstrlikte ótken onlaın brıfıngide.
Oqıǵany qysqasha baıandap ótsek, Qazgıdromet ortalyǵynyń - 43 gradýsqa deıingi qatty aıaz bolatyny týraly eskertýge qaramastan, júrgizýshi Reseı Federatsııasynan Qyrǵyzstan Respýblıkasyna júk avtomobılimen jolǵa shyqqan. Biraq aýa raıynyń qolaısyzdyǵynan mashınadaǵy janarmaı qatyp qalǵan.
«Osyndaı qıyn jaǵdaıda júrgizýshini qatty úsik shalýy múmkin edi. Alaıda, jol boıynda turǵan júk kóligin sol jerde qyzmet atqaryp júrgen polıtseıler baıqap, birden kómekke kelgen. Olar úlken júkti jyly boksqa aparyp, júrgizýshige jylynýǵa kómektesken. Kólik aqaýy jóndelgen soń júrgizýshi qaıta jolǵa attanǵan», - deıdi resmı ókil.
Jyl basynan beri aýa raıynyń qolaısyzdyǵynan avtomobıl joldaryndaǵy kólik quraldary qozǵalysynyna 100-den astam shekteý qoıyldy. Atap aıtqanda, Aqmola, Qaraǵandy, Shyǵys Qazaqstan, Qostanaı, Pavlodar jáne Almaty oblystarynda kólik qozǵalysyna shekteý engizildi.
Shekteý kezinde jol belgileri men qorshaýlar qoıyldy. Qolaısyz aýa raıy jaǵdaılarynda jol qaýipsizdigin qamtamasyz etý, qıyn jaǵdaıǵa tap bolǵan adamdarǵa kómek kórsetý úshin patrýldik polıtsııa jasaqtary kezekshilik etti. Osy kezeńde qar qursaýynan 50-ge jýyq avtokólik shyǵarylǵan.
«ІІM qys mezgilinde aýa-raıynyń qozǵalys rejımderine áser etetinin, jaýyn-shashyn kezinde zattardyń kórinýi nasharlaıtynyn eskerý kerektigin eske salady. Júrgizýshiler aýa-raıy jaǵdaılaryn eskerip, qaýipsiz jyldamdyqty jáne avtomobılder arasyndaǵy qashyqtyqty saqtaý qajet», - deıdi N. Oraz.
