Qyrǵyzstan mılıtsııasy halyqtan zańsyz saqtalyp otyrǵan qarý-jaraqtardy satyp alýda
BІShKEK-OSh. 18 qańtar. QazAqparat /Arnur Rahymbekov/ - Osh qalasynyń Іshki ister basqarmasy 2010 jyldyń maýsym aıyndaǵy oqıǵadan keıin azamattardyń qoldarynda zańsyz saqtalyp otyrǵan qarý-jaraqtardy satýp alýdyń ekinshi naýqanyn jarııalady.
Іshki ister basqarmasynyń baspasóz qyzmetinen habarlaǵandaı, qarý-jaraqty tapsyrǵandardy aqshalaı syılyq kútip tur. Avtomat úshin - 10 myń som (shamamen 200 dollar), túrli úlgidegi tapansha úshin 5 myń som (100 dollar), granata jáne ańshy myltyǵy úshin 2 myń somǵa deıin syıaqy qarastyrylyp otyr.
Kúsh-qýat qurylymdary ótken jyldyń maýsym aıynda oryn alǵan qaıǵyly jaǵdaı bolǵan shaqta jáne odan keıin osyndaı is-shara ótkizip, sol oqıǵalar kezinde halyqtyń qolyna túsip qalǵan qorǵanys mınıstrliginiń, shekara qyzmeti men quqyq qorǵaý organdarynyń qarý-jaraqtaryn tapsyrýǵa úndeý tastaǵan edi.
Qoldaǵy derekter boıynsha, ázirge úsh adam ǵana eki avtomat pen bir tapansha tapsyrǵan.
«Qarý-jaraqtardy tapsyrǵandardyń aty-jónderin jarııa etpeýge kepildik beremiz», - deıdi ishki ister basqarmasyndaǵylar.
