Qyrǵyzstan men Jambyl oblysy vegetatsııa kezeńinde sý tapshylyǵy bolmas úshin kelisimge keldi
30 naýryzda Bishkekte Jambyl oblysynyń ákimi Berdibek Saparbaev Qyrǵyz Respýblıkasynyń Premer-mınıstri Muhammed Ábilǵazıevpen kezdesti.
Qazaqstan tarapynan kelissózge ekologııa, geologııa jáne tabıǵı resýrstar vıtse-mınıstri Sergeı Gromov jáne Tótenshe jáne Ókiletti Elshi Qaırat Nurpeıisov, Qyrǵyzstannyń sý resýrstary jónindegi memlekettik agenttiktiń dırektory Kókimbek Tashtanalıev jáne Ulttyq Energoholdıng basqarmasynyń tóraǵasy Aıtmamat Nazarov qatysty.
Kezdesý barysynda Berdibek Saparbaev jan-jaqty ekonomıkalyq kooperatsııanyń, tranzıttik-kólik, sý-energetıka jáne ınvestıtsııalyq salalardaǵy máselelerdi birlesip sheshýdiń mańyzyn atap ótti. Ol Jambyl oblysynyń aýyl sharýashylyǵy klasterin damytý Qyrǵyzstannyń keletin Shý men Talas ózenderiniń sýyna baılanysty ekenin jáne Qazaqstan bul máselede qoldaý kútetinin jetkizdi.
Sondaı-aq, kezdesýde Kúrkireý ózeniniń memleketaralyq sý paıdalaný nysandarynyń tizimine enbegen úsh kanalynyń máselelerine kóńil bólindi. 15 jyl boıy osy ózenniń bul arnalary arqyly Qazaqstanǵa sý túspegen.
Kezdesý qorytyndysy boıynsha, Qyrǵyz tarapy bekitilgen keste men josparǵa sáıkes, vegetatsııalyq kezeńde Jambyl oblysyna sýarmaly sýdyń jetkilikti kólemin túsirý úshin kómek kórsetýge daıyn ekenin bildirdi.
Qyrǵyzstannyń Premer-Mınıstri Muhammedqalı Ábilǵazıev qaralǵan máselelerdi sheshý, onyń ishinde sý jetkizý kestesin saqtaý, Kúrkireý ózenin Memleketaralyq sý paıdalaný nysandarynyń tizimine engizý jóninde jaýapty tulǵalarǵa birqatar tapsyrmalar berdi.