Qyrǵyzstan men Tájikstan prezıdentteri shekaradaǵy qaqtyǵysty talqylady

SAMARQAND. QazAqparat - Qyrǵyzstan men Tájikstan prezıdentteri Samarqandtaǵy Shanhaı Yntymaqtastyq Uıymynyń (ShYU) sammıti aıasynda qyrǵyz-tájik shekarasyndaǵy jaǵdaı boıynsha kelissózder júrgizdi, dep habarlaıdy QazAqparat menshikti tilshisi.

Sadyr Japarov pen Emomalı Rahmon tıisti qurylymdarǵa atysty toqtatyp, kúshter men quraldardy urys alańynan shyǵarý týraly tapsyrma berýge kelisti. Eki eldiń arnaıy qyzmetiniń basshylary oqıǵa ornynda jumys isteıtin bolady, oqıǵanyń mán-jaıy men sebepterin anyqtaý úshin komıssııa quryldy.

Qyrǵyzstan men Tájikstannyń memlekettik shekarasyn delımıtatsııalaý jáne demarkatsııalaý jónindegi úkimetaralyq komıssııasynyń jumysyn jedeldetý týraly kelisimge qol jetkizildi.

Tájikstan men Qyrǵyzstan shekarasyndaǵy qaqtyǵys sársenbi, 14 qyrkúıekte bastaldy. Qyrǵyzstan shekara qyzmeti tájik áskerılerin ortaq shekaranyń belgilenbegen ýchaskesinde pozıtsııa ustandy dep aıyptady. Tájik tarapy óz sarbazdaryna sebepsiz oq jaýdyrǵanyn alǵa tartady.

Mádıbek Jánibekov