Qyrǵyzstan men Tájikstan atysty tolyqtaı toqtatý týraly kelisimge keldi
Qyrǵyzstan ulttyq qaýipsizdik komıtetiniń basshysy Kamchybek Tashıev kelissózder qorytyndysy boıynsha 4 pýnktten turatyn hattama qabyldanǵanyn aıtty
«Bul hattama eki eldiń múddesine sáıkes keledi. Bizdiń halyqtar qıyn kezeńderdi bastan ótkerýde. Eki elde de tragedııa boldy. Bizge jumysty júrgizý qıynǵa soqty, biraq soǵan qaramastan bizdiń memleket basshylarynyń nusqaýymen biz atysty tolyǵymen toqtatyp, barlyq áskerı quramdardy ózderiniń turaqty ornalastyrý oryndaryna alyp ketýge sheshim qabyldadyq. Budan bylaı qurmetti kórshilerimizdiń kúsh-jigeri men bizdiń kúsh-jigerimiz arqyly elderimizge, ásirese shekara mańyndaǵy aımaqtarǵa beıbitshilik pen tynyshtyq keledi», - deıdi Tashıev.
Tájikstan ulttyq qaýipsizdik komıtetiniń basshysy Saımýmın ıAtımov kelissózder barysynda memleket basshylarynyń bastamasymen nátıjeli áńgime bolǵanyn aıtty.
«Shekaralas aýdandarda bolǵan qaıǵyly jaǵdaı eshqashan qaıtalanbaýy kerek. Bul aýmaqta bizdiń halyqtar ómir súretindikten, olar dostyq qarym-qatynasta jáne olardyń arasynda eshqandaı kelispeýshilik joq. Biz, saıasatkerler, barlyq máselelerdi sheship, halqymyzǵa dástúrli beıbitshilik pen dostyqta ómir súrýge múmkindik berýimiz kerek. Qyrǵyz-tájik jerinde beıbitshilik pen turaqtylyqqa qol jetkizý týraly prıntsıptik kelisim jasaldy. Biz muny isteı alatynymyzǵa jáne ony tezirek sheshetinimizge senimdimin jáne bizdiń halyqtarymyz árqashan dostyq pen ózara túsinistik qarym-qatynasta ómir súredi», - deıdi ol.