Qyrǵyzstan men Ózbekstannan keletin ónimderge shekteý qoıylmaq
«Atap aıtqanda, Qyrǵyz Respýblıkasynan tuqymdyq jáne azyqtyq kartopqa, alma, qurma, al Ózbekstannan anar kirgizýge shekteý qoıyldy. Sońǵy ýaqytta Qyrǵyz Respýblıkasy men Ózbekstannan engizilgen, karantınge jatqyzylǵan ónimderden júıeli túrde mynadaı karantındik obektilerdiń anyqtalýy jıilep ketti: naqtyraq aıtsaq, alma men qurmada karantındik obekt - komstok symyry anyqtaldy. Al kartopta altyn tústes jumyrqurttyń bary belgili boldy», - dedi QR Aýyl sharýashylyǵynda ótken baspasóz máslıhatynda AÓK Memlekettik ınspektsııa komıteti basshysynyń orynbasary Almabek Mars.
Belgili bolǵandaı, 2018 jyly jáne osy jyldyń qańtar-aqpan aılaryndaǵy Qyrǵyzstannan Qazaqstanǵa jetkizilgen karantındik júkterdi tekserý kezinde biryńǵaı karantındik fıtosanıtarııalyq talaptardyń buzylýynyń 465 faktisi tirkelgen.
«Osy jyly Ózbekstan aımaǵynan engizilgen anardan 2 komstok symyry anyqtaldy», - deıdi Almabek Mars.
Mamandardyń aıtýyna qaraǵanda, symyrdyń shoǵyrlanýy jemistiń ósý núkteleri men órkenniń kebýine, qýraýyna, japyraqtyń sarǵaıýy men túsýine, ósimdiktiń qýraýyna ákelip soǵady. Jemis qatty zalaldanǵan ýaqytta keýip, qataıyp, sapasy men dámi nasharlaıdy jáne salmaǵy azaıady. Al kartoptyń altyn tústes jumyrqurty tamyr men túıindi zaqymdap, kartopqa zııan keltiredi.