Qyrǵyzstan men Aýǵanstan aımaqtaǵy turaqsyz ortalyq bolyp otyr - saıasattanýshy Sháripbek Ámirbekov
ALMATY. Mamyrdyń 19-y. QazAqparat /Erlik Erjanuly/ - Biz eki úlken turaqsyz ortalyqtyń ortasynda otyrmyz. Bul búgin Almatyda ótip jatqan «Qazaqstan jáne qazirgi zamanǵy jahandyq qaýip-qaterler» dep atalatyn halyqaralyq ǵylymı-tájirıbelik konferentsııada aıtyldy,
dep habarlaıdy QazAqparat.
«Aımaqtaǵy turaqsyz ortalyq qazir Qyrǵyzstan men Aýǵanstan bolyp otyr. Aýǵanstandaǵy úrdis birshama uzaqqa sozylatyn túri bar. Sebebi ekonomıkasy men halyqtyń mentalıteti batys qundylyqtaryn birden engizýge uzaq ýaqytty qajet etýde. Al Qyrǵyzstandaǵy jaǵdaıdy sarapshylar ekinshi Aýǵanstan bolyp ketýi múmkin dep otyr. Onda qalyptasqan jaǵdaı bul eń aldymen kórshiles Qazaqstan, Reseı men Ózbekstannyń osy elge baılanysty ustanymy boıynsha sheshiledi. Sebebi qazir qarap otyrsaq, Bákıevtiń jaqtastary da, Ýaqytsha úkimet te bir kezeńdi bastan keshirip jatyr. Taraptar kelispeıtin bolsa, lańkestik sharalar kóbeıip ketýi múmkin», deıdi saıasattanýshy Sháripbek Ámirbekov. Ǵalymnyń aıtýynsha, taraptar ózara túsinistikke kele almasa, jasyryn partızandyq ádiske kóshýi múmkin. Kórshi elde osyndaı jaǵdaıdyń bolýy Qazaqstan úshin de birshama qaýipti. Onyń bir ushy qarý-jaraqta. Memlekettik bılik álsiz bolǵan jerde aımaqtardyń kúsheıýi bastalady.
«Qyrǵyzstanda esirtki ósirýge jaǵdaı bar. Onda keńestik kezeńde ósirip kelgen. Bul jaǵdaı endi kúsheıip ketýi múmkin. Jumyssyz halyq ony qarjy tabýdyń bir kózine aınaldyrýy múmkin. Sondaı-aq qarý-jaraq saýdasynyń kúsheıý qaýpi bar. Ol kórshi elderge de áser etedi. Qarý-jaraqqa qol jetkizý ońaı bolǵan saıyn qaı elde bolmasyn ol birshama turaqsyzdyq alyp keledi. Qazir bul elge yqpal etýdiń eń tıimdi joly ekonomıkalyq saıasat bolyp otyr. Búgingi tańda kún tártibinde mynadaı másele tur. Kimge kómek beremiz degendi halyqaralyq uıymdar da, kórshi elder de sheshe almaı otyr. Ol sheshilse, barlyq máseleniń túıini de birtindep sheshile bastaıdy», deıdi Sháripbek Ámirbekov.
