Qyrǵyzstan men Armenııadan kólik ákelý úshin kedendik bajdy tóleý kerek
Memlekettik kirister komıtetiniń málimetinshe, qazirgi ýaqytta halyq jeke paıdalanýǵa arnalǵan avtomobılderdi ákelýge belsendi qyzýshylyq tanytyp otyr. Suraq kóbinese úshinshi elderden ákelinetin avtomobılder boıynsha, sondaı-aq Eýrazııalyq ekonomıkalyq odaqqa múshe Armenııa, Belarýs, Reseı jáne Qyrǵyzstannan ákelinetin avtomobılder boıynsha qoıylady.
«Úshinshi elderden ákelinetin avtomobılder, ıaǵnı sheteldik avtomobılderdi ýaqytsha 1 jylǵa sheteldik tulǵalar eshqandaı kedendik tólemderdi tólemeı ákele alady. Eýrazııalyq ekonomıkalyq odaqqa múshe memleketterdiń tulǵalary sheteldik avtomobılderdi tek kedendik tólemderdi qamtamasyz etken jaǵdaıda ýaqytsha 1 jylǵa ákele alady, bul degenimiz qarjylyq kepil bolyp tabylady», delingen habarlamada.
Komıtettiń habarlaýynsha, Qazaqstan azamattary el aýmaǵyna 2014 jylǵy 1 qańtarǵa deıin Qyrǵyzstanda rásimdelgen avtomobılderdi jáne 2014 jylǵy 10 qazanǵa deıin Armenııada rásimdelgen avtomobılderdi ǵana ákele alady.
«Qyrǵyzstanda 2014 jylǵy 1 qańtardan bastap 2020 jylǵy 1 qańtarǵa deıingi kezeńde; Armenııada 2014 jylǵy 10 qazannan bastap 2020 jylǵy 1 qańtarǵa deıingi kezeńde rásimdelgen avtomobılder sheteldik taýarlar bolyp tabylady jáne kedendik baqylaýǵa jatady. Kórsetilgen avtomobılderdi Qazaqstan aýmaǵyna tek Qyrǵyzstanda jáne Armenııada turaqty turatyn tulǵalar ýaqytsha ákele alady», delingen habarlamada.
Komıtet Qyrǵyzstanda jáne Armenııada turaqty turmaıtyn tulǵalar atalǵan avtomobılderdi Qazaqstan Respýblıkasynyń aýmaǵyna qandaı jaǵdaıda ákele alatynyn túsindirdi.
«Jeke paıdalanýǵa arnalǵan taýarlarǵa baılanysty keıbir máseleler týraly» Eýrazııalyq ekonomıkalyq komıssııa keńesiniń 2017 jylǵy 20 jeltoqsandaǵy № 107 sheshimniń 2-qosymshasynda kórsetilgen mólsherlemeler boıynsha kedendik bajdar, salyqtar somalarynyń aıyrmasy mólsherinde kedendik bajdardy, salyqtardy tólegennen keıin elge avtomobıldi ákele alady. Al Armenııadan kólik ákelýi boıynsha 2023 jylǵy 1 qańtardan keıin ǵana, Qyrǵyzstannan 2025 jyldyń 1 qańtarynan keıin kólik ákele alady», delingen habarlamada.
Komıtet elimizde Mońǵolııadan ákelingen jáne keıinnen Qazaqstannyń ishki ister organdarynda tirkeý esebine zańsyz qoıylǵan avtomobılder bar ekenindigi atap ótti.
«Osyndaı avtokólik quraldary sheteldik taýar bolyp esepteledi jáne olar boıynsha tıisti sharalar qabyldanady», dep málim etti vedomstvodaǵylar.
Memlekettik kirister komıteti avtomobıl satyp alarda aýmaqtyq memlekettik kirister organdaryna júginip, avtomobıldiń kedendik tazartýdan ótkendigi jáne zańdy ákelingendigin tekserip alýǵa keńes beredi.
