Qyrǵyzstan «Manas» bazasy boıynsha AQSh-pen shartty úzedi
ASTANA. 21 mamyr. QazAqparat - Qyrǵyzstan bıligi qazir Tranzıttik tasymaldar ortalyǵy ornalasqan burynǵy «Manas» avıabazasy boıynsha AQSh-pen yntymaqtastyq týraly kelisimdi toqtatpaq.
Bul týraly Rosbalt qyrǵyz úkimetiniń baspasóz qyzmetine silteme jasap habarlaıdy.
Baspasóz qyzmetiniń málimetine qaraǵanda, shart 2014 jylǵy 11 maýsymda toqtatylmaq. Kelisimdi úzý «Manas» bazasymen baılanysty barlyq nysandar men jyljymaıtyn múliktiń barlyq túri boıynsha kelisimderdi toqtatý degendi bildiredi.
Qyrǵyzstan Úkimeti parlamenttiń bekitýine qaýly jobasyn usynady.
Eske sala keteıik, budan buryn Vashıngton Qyrǵyzstan úkimetimen «Manas» tranzıttik ortalyǵyna qatysty kelisimdi uzartý múmkindigi týraly kelissózderdi bastaǵan bolatyn.
Atap óteıik, 2012 jylǵy qyrkúıekte Reseı Prezıdenti Vladımır Pýtın Qyrǵyzstanǵa saparynyń qorytyndysymen qol jetken ýaǵdalastyqtarǵa sáıkes Reseı Qyrǵyzstandaǵy áskerı bazaǵa baqylaýdy keminde 2032 jylǵa deıin saqtaıdy. Shart 2017 jyly kúshine enedi, ol 15 jylǵa eseptelgen, odan keıin bes jylǵa uzartylýy múmkin.
Sonymen qatar, Reseı Qyrǵyzstannyń 2005 jylǵy 5 qyrkúıektegi 189 mln. dollar qaryzyn keshirdi. 2009 jylǵy 300 mln. dollar mólsherindegi bereshegine qatysty aıtar bolsaq, onyń qaldyǵy alty jyldyń ishinde esepten shyǵarylady.
Sondaı-aq Máskeý men Bishkek Qambarata GES-І qurylysy jáne ony paıdalaný jóninde kelisimge qol qoıdy. Qurylysqa jeńildetilgen nesıe tartý kózdelgen.
