Qyrǵyzstan Latvııadan Q.Bakıevtiń ulyn ustap berýdi surap otyr
ASTANA. Mamyrdyń 11-i. QazAqparat - Qyrǵyzstannyń ýaqytsha úkimeti Latvııanyń Bas prokýratýrasyna taǵynan taıdyrylǵan Qurmanbek Bakıevtiń kishi uly - Maksım Bakıevti ustap berý týraly saýal joldady.
Latvııa buqaralyq aqparat quraldarynyń málimetteri boıynsha, 32 jastaǵy M.Bakıev qazir sol elde kórinedi, dep habarlaıdy Reuters agenttigi.
Latvııa Bas prokýratýrasynyń ókili Andreıs Vasks, onyń vedomstvosy qyrǵyz ókimetinen óz saýalyn naqtylaýdy ótingenin, sebebi qujattyń qazirgi mazmuny «qarama-qaıshy jáne túsiniksiz ekenin» atap kórsetti. A.Vasks sondaı-aq, M.Bakıevtiń Latvııada júrgendigi týraly resmı málimettiń joq ekenin aıtty.
Mamyrdyń 4-inde Qyrǵyzstan ókimeti M.Bakıevtiń ústinen qylmystyq is qozǵap, halyqaralyq izdeý jarııalaǵan bolatyn. Jańa ókimet eks-prezıdenttiń ulynan basqa, onyń baýyrlary Janybek, Ahmatbek jáne Qanybekke izdeý salyp otyr. Olarǵa qosa, Bakıevtiń tóńiregindegi burynǵy sheneýnikter, atap aıtqanda Danııar Úsenov (eks-premer-mınıstr), Igor Chýdınov (eks-premer-mınıstr), Saparbek Balqybekov (burynǵy ónerkásip mınıstri), Qurmanbek Temirbaev ( Prezıdent isteri basqarmasynyń burynǵy basshysy), Ákimjan Mýıbıllaev (qarjy polıtsııasy qyzmetiniń burynǵy basshysy), Alekseı Elıseev (Damý qorynyń burynǵy basshysy), sondaı-aq «sur kardınal» sanalatyn Alekseı Shırshov pen ІІM joǵary laýazymdy qyzmetkeri Nurlan Temirbaev ta izdeýde júr.
