Qyrǵyzstan koronavırýsqa baılanysty kúrdeli epıdemıologııalyq ahýalǵa daıyndalýda
BІShKEK. Kabar - QazAqparat – Koronavırýs ınfektsııasyna baılanysty elde epıdemıologııalyq ahýaldyń nasharlap ketý yqtımaldylyǵyna daıyn bolý qajet. Bul týraly Qyrǵyzstan premer-mınıstri Kýbatbek Boronov brıfıng barysynda málim etti, dep habarlaıdy QazAqparat «Kabar» agenttigine silteme jasap.
«COVID-19 pandemııasyna baılanysty aǵymdaǵy áleýmettik-ekonomıkalyq jáne epıdemıologııalyq ahýal kúrdelene túsýde. Azamattardyń koronavırýs ınfektsııasyn juqtyrý oqıǵalary kúndelikti tirkelip otyr. Ásirese Bishkek pen Osh qalalarynda, Shý oblysynda jaǵdaı kúrdeli. Bul rette, óńirlerde jaǵdaıdy baqylaý boıynsha jumystar qajetti deńgeıde júrgizilmeı otyr. Qyrǵyz Respýblıkasynyń qaýipsizdik keńesiniń otyrysynda atap ótilgendeı, oblystardyń basshylary ózderine senip tapsyrylǵan aýmaqtardaǵy epıdemıologııalyq ahýalǵa tikeleı jaýapty», - dedi Kýbatbek Boronov.
Qyrǵyz Respýblıkasy Qaýipsizdik keńesiniń sheshimimen memleket aýmaǵynda tıisti epıdemıologııalyq qadaǵalaýdy qamtamasyz etý tapsyryldy.
«Sheshimde kórsetilgen barlyq tapsyrma sapaly, tolyq kólemde jáne ýaqtyly oryndalýy tıis. Árbir memlekettik organ jáne árbir oblys kúz-qys kezeńine keshendi daıyndyq sharalaryn iske asyrýy qajet. Bul, naýqastar sanynyń artýyna medıtsına mekemeleriniń daıyn bolýyna, sondaı-aq ekonomıkalyq qyzmettiń túrli baǵyttarynyń jumysyna baılanysty. Sonymen qatar COVID-19-ben syrqattanýdyń artýyna baılanysty birqatar sharalar qabyldanady», - dedi ol.
Aqparatqa sáıkes, Bishkek qalasynda senbi kúni tústen keıin jáne jeksenbide kúni boıy qoǵamdyq kólik qozǵalysy toqtaıdy. Sondaı-aq qoǵamdyq kóliktiń óńirler arasynda qatynaýyna tyıym salý qarastyrylýda. Bul rette, taksı, jeke kólik jáne júk tasıtyn avtokólikter kedergisiz qozǵala bermek.
Qyrǵyzstan Úkimetiniń basshysy árbir azamat óziniń jáne jaqynynyń densaýlyǵy úshin jaýapty ekenin qadap aıtty.
