Qyrǵyzstan qazaqtary qaýymdastyǵy 30 jyldyǵyn atap ótýde
Sharaǵa Qyrǵyzstan Respýblıkasy Mádenıet, aqparat, sport jáne jastar saıasaty mınıstriniń orynbasary Samat Shatmanov, Halyq jazýshysy jáne Qazaqstan Respýblıkasynyń Qyrǵyzstandaǵy tuńǵysh Elshisi Muhtar Shahanov, Qyrǵyzstan Respýblıkasy halqy Assambleıasynyń tóraǵasy Abdyǵany Erkebaev, «Otandastar qory» KEAQ prezıdenti Abzal Saparbekuly, memleket jáne qoǵam qaıratkeri Saılaý Batyrshauly, Qazaqstan Respýblıkasynyń Qyrǵyzstan Respýblıkasyndaǵy Elshisi Rápil Joshybaev, Qyrǵyz dıplomatııalyq akademııasynyń prorektory Zaınıdın Qurmanov, «Otandastar qorynyń» joba úılestirýshisi, tarıh ǵylymdarynyń doktory Qalybek Qobylandın, «Qyrǵyzstan qazaqtary qaýymdastyǵy» qoǵamdyq birlestiginiń tóraıymy Gúlshat Asylbaeva, sondaı-aq saıası, ǵylymı jáne qoǵamdyq-iskerlik toptardyń basqa da ókilderi, qazaqstandyq dıplomattar men Qyrǵyzstandaǵy qazaq dıasporasynyń ókilderi qatysty.
«Otandastar qorynyń» prezıdenti Abzal Saparbekuly eki memleket arasyndaǵy dostyq pen yntymaqtastyqty nyǵaıtýǵa baǵyttalǵan mundaı kezdesýlerdiń mańyzdylyǵyn atap ótti. Qazaqstan men Qyrǵyzstan arasyndaǵy dostyq baılanys, ortaq tarıh, shyǵarmashylyq jáne mádenı baılanystar, til, din jáne dástúr strategııalyq, saıası jáne ekonomıkalyq áriptestiktiń damýyna yqpal etedi. Búgingi shara – baýyrlas elderdiń uly dostyǵynyń «altyn kópiri», - dedi ol.
Dóńgelek ústel barysynda qatysýshylar tarıhı tulǵalardyń, ult zııalylary ókilderiniń eki eldiń mádenıeti men ǵylymynyń damýyna qosqan úlesin talqylady.
Qyrǵyzstan Respýblıkasynyń saıasat jáne memleket qaıratkeri Medetqan Sherimqulov baýyrlas halyqtardyń tarıhı-geografııalyq jaqyndyǵyna toqtalyp, olardyń ortaq gúldenýine qosar úlesin atap ótti.
«Qyrǵyzdar men qazaqtar – baýyrlas halyq. Tili, mádenıeti, tarıhy jaǵynan olar óte jaqyn. Búgingi tańda eki el arasyndaǵy qarym-qatynas memleketaralyq damýdyń joǵary deńgeıine kóterildi. 30 jyl ishinde eki respýblıkanyń qarym-qatynasy, ásirese, ekonomıkalyq, saýda-qarjylyq yntymaqtastyǵy jaǵynan jaqyndaı tústi. Eki memleket arasyndaǵy mádenı-gýmanıtarlyq, bilim berý baılanystary ejelden damyp keledi. Jýyrda Astanada Qyrǵyzstan Respýblıkasynyń Qazaqstandaǵy mádenıet kúnderine eki memleket basshylary S.Japarov pen Q.Toqaev, sondaı-aq Eýropalyq Odaqtyń Prezıdenti Sh.Mıshel qatysty. Qazaqstan jyly qarsy alyp, qonaqjaılyq tanytty. Baýyrlas elder arasyndaǵy mundaı qarym-qatynas aldaǵy ýaqytta da jalǵasyn tabady dep oılaımyn», - dedi ol.
Óz kezeginde sóz alǵan «Qyrǵyzstan qazaqtary qaýymdastyǵy» qoǵamdyq birlestiginiń tóraıymy Gúlshat Asylbaeva Qyrǵyzstan Respýblıkasy men Qazaqstan Respýblıkasy arasyndaǵy ekijaqty yntymaqtastyqty damytýdaǵy qazaq dıasporasynyń róli men úlesine toqtaldy.
«Jeti mıllıon halqy bar Qyrǵyzstanda 30-dan astam etnostyń ókilderi birge turady, biraq qazaqtar – Qyrǵyzstannyń damýyna óziniń laıyqty úlesin qosyp, tıtýldy ultqa eń genetıkalyq jáne psıhıkalyq jaqyn. Asyra aıtpaı-aq aıta keteıin, qazaq halqynyń ókilderi 70 jyldyq keńestik jáne qazirgi kezeńde Qyrǵyzstannyń ekonomıkasy, mádenıeti, óneri, medıtsınasy, bilim berýi sııaqty kóptegen salalarda damýyna zor úles qosty. Qazaq ultynyń belgili ókilderiniń arasynda saıasatkerler, bıznesmender, sport qaıratkerleri de bar. Qazaqtar qaýymdastyǵy mańyzdy mıssııany oryndaı otyryp, dástúrli, tarıhı ádet-ǵuryptardy saqtaýǵa, Qazaqstan men Qyrǵyzstan arasyndaǵy mádenı dıalogtyń kópiri bolýǵa jáne azamattyq tatýlyqty odan ári saqtaý men nyǵaıtý, dostyq pen ultaralyq kelisimdi nyǵaıtý máselelerin sheshýde oń ról atqarýǵa tyrysady», - dedi G. Asylbaeva.
Qyrǵyzstandaǵy mereıtoılyq shara K.Ázirbaev atyndaǵy Jambyl oblystyq fılarmonııasy shyǵarmashylyq ujymynyń qatysýymen kontsertpen jalǵasty.
