Qyrǵyzstan kartobyna engizilgen ýaqytsha shekteý der kezinde jasaldy - Qaırat Bısetaev
«Qazirgi kezde qyrǵyz kartobyna shekara jabyldy. Buǵan oryndy sebep bar, ıaǵnı altyn tústes jumyr qurttyń taralýyna jol bermeýge qatysty jasalyp otyr. Azyq retinde osy kartopty paıdalanǵan kezde qater joq, alaıda ol basqa daqyldarǵa juǵýy múmin. Bul qurt túınekke túsip, keıinnen topyraqta jınalyp, basqa daqyldarǵa zaqym keltiredi. 10 jyl merzimde ónim shyǵymdylyǵynyń 90 paıyzyna deıin zalal keltirýi yqtımal. Óte qaýipti ósimdik aýrýy», - dedi Q. Bısetaev.
Osy rette ol tıisti organdar qys merziminde bul aýrýdy kartoptan anyqtaǵanyn aıta kele, aqpan aıynyń basynda odaq Aýyl sharýashylyǵy mınıstrligine Qazaqstanǵa karantındik aýrýdyń kartoppen birge enýine shekteý jasaý ótinimin jasaǵanyn jetkizdi.
«Bizdiń ótinimge qoldaý jasaldy. Degenmen bul úderis uzaqqa sozyldy, ıaǵnı 2 aıdan astam ýaqytqa jalǵasty. Biraq ta shekteý jasaldy. Bul qurt qapshyqtarmen, ydystardaǵy topyraqpen alysqa taralýy múmkin. Bizdiń oıymyzsha, bul qurty bar kartop tuqym retinde paıdalanylýy qaýpi bar. Osy rette budan keıingi ýaqytta da QR Aýyl sharýashylyǵy mınıstrligi shetten keletin qaterlerge jedel áreket etedi dep senemiz», - dedi ol.
Esterińizge sala keteıik, QR Aýyl sharýashylyǵy mınıstrliginiń baspasóz qyzmetinen Qazaqstan Qyrǵyzstannan kartop ákelýge ýaqytsha tyıym salǵanyn habarlady.
«Sońǵy kezde Qyrǵyz Respýblıkasynan karantındi nysan - Globodera rostochiensis (Wollenweber) Behrens altyn tústes kartop vırýsin juqtyrǵan ónimdi jetkizý jaǵdaılary jıiledi. Aǵymdaǵy qańtar aıynan beri ǵana vırýs juqtyrǵan kartopty ákelýdiń 79 oqıǵasy anyqtalyp, oǵan jol berilmedi, Qyrǵyz Respýblıkasyna bul kókónistiń 1000 tonnadan astamy keri qaıtaryldy», - delingen habarlamada.
Kartop globoderozyna ákelip soqtyratyn bul vırýs óte zararly ekenin atap ótý kerek. Kartop óniminiń sapasyn joǵaltý kórsetkishi 25-ten 90 paıyzǵa deıin jetedi, bul topyraqtyń zararsyzdanýy men suryp turaqtylyǵyna baılanysty.