Qyrǵyzstan ІІM: Atambaevtyń elden shyǵýyna tyıym sala almaımyz
BІShKEK-NUR-SULTAN. QazAqparat – Qyrǵyz Respýblıkasy Іshki ister mınıstrligi eldiń burynǵy prezıdenti Almazbek Atambaevtyń elden shyǵýyna jáne elge kelýine tyıym salynbaıtynyn málimdedi, dep habarlaıdy «QazAqparat» HAA Kabar agenttigine silteme jasap.
«Almazbek Atambaev kýáger retinde tergeý amaldarynan ótýi tıis. Qyrǵyz Respýblıkasynyń Qylmysty-protsestik kodeksiniń talaby - osy. Zań boıynsha, biz onyń elden shyǵýyna, elge kirýine tyıym sala almaımyz. Onyń ózi qaıtatynyn jurtqa ashyq málimdep otyr. Elge kelgen soń quqyqtyq arnaǵa kiredi dep oılaımyz. Dáliregi, jaýap alý protsesine ózi keledi. Sotqa deıingi óndiris boıynsha tergep-tekserý úzdiksiz jalǵasyp jatyr», - delingen habarlamada.
Eske sala keteıik, Qyrǵyzstannyń burynǵy prezıdenti Almazbek Atambaev «dostarymen kezdesý» úshin Kanttaǵy Reseı áýe bazasynan Máskeýge ushyp ketken bolatyn.
