Qyrǵyzstan: ІІB ǵımaratyn jaryp jibermek bolǵandar qolǵa tústi
ASTANA. 2 qańtar. QazAqparat - Qyrǵyzstanda sáýirdegi oqıǵaǵa qatysty sot protsesi ótip jatqan Sport saraıy men Bishkek qalalyq ІІB ǵımaratyn jaryp jibermek bolǵandar qolǵa tústi. Eldiń Ulttyq qaýipsizdik komıteti taratqan aqparatqa qaraǵanda, 9 adam qazir tergeý aldynda jaýap berýde. Taǵy beseýine halyqaralyq izdeý jarııalanǵan. Barlyǵy ekstremıstik toptardyń músheleri kórinedi, dep habarlaıdy KTK telearnasy.
Bishkektegi lańkestik áreket osydan bir aı buryn oryn alǵan. Qastandyq saldarynan tórt adam jaralandy. Al bir apta buryn qaskóıler qalalyq ІІB-syn jarýǵa árekettengen bolatyn. Qyrǵyz Ulttyq qaýipsizdik komıtetindegiler ustalǵandardyń «reseılik dinı ekstremıstik uıymdarǵa qatysy bar» dep otyr. Sondaı-aq "lańkester Qazaqstan aýmaǵynda daıyndyqtan ótipti" degen aqparat ta tekserilýde. Arnaıy operatsııa barysynda kúdiktilerdiń páterlerinen qaraý-jaraq, jarylǵysh zattardy jasaýǵa arnalǵan quraldar men dinı kitaptar tabylǵan. Qaýipsizdik komıtetiniń málimetinshe, olar Qyrǵyzstan aýmaǵynda 30-dan astam jarylys uıymdastyrmaq bolypty. Tártip saqshylary olardyń 14-iniń jolyn kesken.
«Lańkester syrttan kelgen. Naqty aıǵaqtarymyz bar. Ustalǵandar da bárin moıyndap otyr. Qalaı daıyndyqtan ótkenin, qalaı kelgenin jáne basqa da qundy málimetterdi aıtyp jatyr. Qolǵa túskender lańkestik toptardyń bir tarmaǵy ǵana eken», - deıdi Qyrǵyzstan Ulttyq qaýipsizdik komıtetiniń tóraǵasy Keneshbek Dúıshebaev.
