Qyrǵyzstan eline arnalǵan "Álem reısi" gýmanıtarlyq kómegi Qazaqstan eliniń aýmaǵy boıynsha ótedi
ALMATY. Shildeniń 17-si. QazAqparat /Názıra Eleýhan/ - Shilde aıynyń 18-i men 20-sy aralyǵynda elimizdiń aýmaǵy boıynsha Qyrǵyzstan eline arnalǵan gýmanıtarlyq kómek - "Álem reısi" aktsııasy ótetin bolady.
Ekaterınbor qalasynan bastalatyn aktsııa - Qostanaı - Astana - Qaraǵandy - Bishkek - Osh baǵyty boıynsha ótedi. Sharanyń uıymdastyrýshylary - Halyqaralyq kóshi-qon uıymy, "Oral úıi" qoǵamdyq birlestigi, Ekaterınbor ultaralyq aqparat ortalyǵy, Ekaterınbor qalasyndaǵy ózbek jáne qyrǵyz qaýymy. Aktsııaǵa qoldaý bildirýshi Germanııanyń iri qoǵamdyq uıymdarynyń biri - «Arbaıtervolfart».
Shara barysynda Sverdlov oblysy jáne Reseı Federatsııasynyń Ekaterınbor qalasynyń turǵyndary qyrǵyz elindegi Osh qalasynda bolǵan qaıǵyly oqıǵadan zardap shekkenderge gýmanıtarlyq kómek jiberetin bolady. Uıymdastyrýshylardyń aıtýynsha, aktsııanyń saıası astary joq jáne bul shara jaqsylyqqa, beıbitshilikke, dostyqqa shaqyrady.
Qyrǵyzstan eliniń ońtústiginde bolǵan oqıǵaǵa kómek kórsetýge arnalǵan "Júrekten júrekke, qoldan qolǵa" atty aktsııa Ekaterınbor qalasynda osydan bir aı buryn birneshe qoǵamdyq uıymdardyń bastamasymen qolǵa alynǵan. Sverdlov oblysynyń turǵyndary, qarapaıym oraldyqtar, ulttyq qaýymdar, qalanyń qoǵamdyq uıymdary qyrǵyz eliniń turǵyndaryna kómek kórsetýge sheshim qabyldap, kıim-keshek, birinshi qajettilikter, azyq-túlik, oıynshyqtar jáne taǵy da basqa zattar jınaǵan. Qazirdiń ózinde ol jerlerde aktsııa jalǵasýda. Búgingi kúni kómektiń 40 tonnasy jınalǵan.
"Qyrǵyz elinde oryn alǵan qaıǵyly oqıǵa bizdi qatty tolǵantty. Biz bul jaǵdaıǵa beı-jaı qaraı almadyq. Qolymyzdan keler bar kómegimizdi berýge daıarmyz. Bul bizdiń azamattyq boryshymyz. Bolǵan jaǵdaıdyń qaıtalanbaýyn tileımiz", delingen uıymdastyrýshylardyń habarlamasynda.
