Qyrǵyzstan depýtattary esek etin ótkizýshilerge qatysty sharalar qabyldaýdy talap etti
BІShKEK. QazAqparat - Qyrǵyzstanda saýda oryndarynda esek etiniń paıda bolýyna baılanysty qyzǵan janjal aıasynda parlament depýtattary «esek etin» ótkizýshilerge qatysty sharalar qabyldaýdy talap etti. Bul týraly búgin Jogoroký Keneshiniń otyrysynda «Ar Namys» fraktsııasynyń ókili Esengýl Isakov málimdedi.
Bul týraly QazAqparat tilshisi habarlaıdy. «Keshe muny kúlli BAQ jazdy. Bizde jappaı esek etin tutynatyndaı áser qaldyrady. Bul isti qolǵa aldyq. Endi qashanǵa deıin sozyla bermek. Bul et naryqqa túsip, odan qoǵamdyq tamaqtaný oryndaryna barýyn kútemiz be? Másele qoǵamdy alańdatýda. Búgin veterınarlyq ınspektsııany, vıtse-premerdi, aýyl sharýashylyǵy mınıstrligin shaqyryńdar, osy suraqtyń jaýabyn bersin. Múmkin biz esek etin tutynyp júrgen shyǵarmyz? Men janýarlardy birdeılendirýdi jedeldetý jaıly birneshe ret aıtqan bolatynmyn», - dep talap etti depýtat.
Parlamentarııdiń talabyn QR JK basqa depýtaty Ismaıl Isakov ta qoldady. Ol atalǵan sheneýnikterdiń túsinik berýge shaqyrýyn talap etti.
Jýyrda «Ala-Too» baǵdarlamasynyń jýrnalısteri Manas aýylynan júzdegen esek eti qoıylǵan saraıdy tapqany belgili boldy. Sokýlýk AІІB jedel tobynyń derekterine súıensek, bul et Bishkektiń belgili dámhanasyna jetkizilgen.
«Kaıtal» esek etin óńdeýshi tsehtyń ıesi Almaz Takyrbashev búgin bolǵan baspasóz konferentsııasynda «meniń tsehymnan esek eti birde-bir shaıhana nemese dámhanaǵa jetkizilgen emes» dep málimdedi. Jergilikti ákimshiliktiń sheshimimen fırma qyzmeti tekserý úshin ýaqytsha toqtatyldy.
Áleýmettik jelilerde bul jańalyq qoǵamnyń narazylyǵyn týdyrdy. Bishkek turǵyndary bul jańalyqty jappaı talqylaýda.
