Qyrǵyzstan azamaty óz otandastaryn Máskeýde kóligimen qaqty - BAQ
MÁSKEÝ. QazAqparat - Máskeýdiń Novocherkassk býlvarynda avtomobıl bir top jaıaý júrginshini qaǵyp ketti. Kem degende bir adam mert boldy. Bul týraly «QazAqparat» HAA TASS agenttigine silteme jasap habarlaıdy.
«Oqıǵa Novocherkassk býlvaryndaǵy 37-úıdiń mańynda boldy. Toǵyz adam zardap shegip, bir adam jedel járdem mashınasynda kóz jumdy», - dep málimdedi qalanyń jedel qyzmetteri.
Máskeý jol qozǵalysy qaýipsizdigi memlekettik ınspektsııasy jol apaty faktisin rastady. «Novocherkassk býlvarynda júrgizýshi kólikke ıe bola almaı, bir top adamdy qaǵyp ketti. Oqıǵanyń mán-jaıy anyqtalyp jatyr», - deıdi polıtseıler. Olardyń aıtýynsha, Volkswagen júrgizýshisi qashyp ketpeı, oqıǵa ornynda bolǵan.
Al RF ІІM Máskeý basqarmasy baspasóz qyzmetiniń aqparatynsha, júrgizýshi muny ádeıi istegen. Buǵan dámhanadaǵy janjal sebep bolǵan.
«Aldyn ala málimetter boıynsha, Novocherkassk býlvaryndaǵy dámhanada birneshe adam ózara janjaldasqan. Olardyń biri kóshege shyǵyp, mashınasyna mingen. Jáne qalǵan adamdardyń ǵımarattan shyǵýyn kútip otyrǵan. Shyqqan soń, kólikti týra solardyń ústine aıdaǵan», - deıdi polıtseıler.
Vedomstvo ókilderiniń málimdeýinshe, oqıǵa qatysýshylarynyń barlyǵy Qyrǵyzstan azamattary.
Foto: Artem Geodakıan/TASS
