Qyrǵyzstan azamattardyń kelýi týraly Qazaqstanmen jasalǵan kelisimdegi ózgeristerdi bekitti
ASTANA. QazAqparat - Qyrǵyzstan azamattardyń kelý reti týraly Qazaqstanmen jasaǵan Kelisimge engizilgen qosymsha týraly hattamany bekitti, dep habarlaıdy KABAR.
Qyrǵyzstan Respýblıkasy Prezıdenti apparatynyń aqparattyq saıasat bólimi habarlaǵandaı, Qyrǵyzstan Prezıdenti Almazbek Atambaev «2016 jyldyń 17 qazan kúni Astana qalasynda qol qoıylǵan 2012 jyldyń 11 mamyryndaǵy Qazaqstan azamattarynyń Qyrǵyzstan aýmaǵynda jáne Qyrǵyzstan azamattarynyń Qazaqstan aýmaǵynda bolý tártibi týraly Qazaqstan Respýblıkasynyń Úkimeti men Qyrǵyzstan Respýblıkasynyń Úkimetiniń arasyndaǵy Kelisimge qosymshalar men ózgerister engizý týraly Hattamany bekitý týraly» Qyrǵyzstan Respýblıkasynyń zańyna qol qoıdy.
Zań 2017 jyldyń 16 naýryzynda Jogorký Keneshpen (Qyrǵyzstan Parlamenti) qabyldandy.
Hattamanyń maqsaty - Qyrǵyzstan azamattarynyń Qazaqstan aýmaǵynda jáne Qazaqstan azamattarynyń Qyrǵyzstan aýmaǵynda bolǵan ýaqytta quqyqtyq qatynasty retteý bolyp tabylady.
Hattamaǵa sáıkes, Qazaqstan aýmaǵyna ýaqytsha kelgen Qyrǵyzstan azamattary quziretti organdarda (turǵylyqty jeri boıynsha tirkeýge turý) 30 kún boıy tirkeýden bosatylady.
Zań resmı jarııalanǵannan keıin jeti kún ótken soń kúshine enedi.
