Qyrǵyzstan astanasyndaǵy jaǵdaı qalypty – Bishkek ІІBB
BІShKEK. QazAqparat – 7 tamyz kúni Qyrǵyzstannyń burynǵy prezıdenti Almazbek Atambaevtyń úıinde bolǵan oqıǵalardan keıin búgin Qyrǵyzstan Bas prokýratýrasy «Jappaı tártipsizdikter», «Buzaqylyq», «Adam óltirý», «Adamdy kepilge alý» baptarymen sotqa deıingi tergeý amaldaryn bastaǵanyn málimdedi, dep habarlaıdy «QazAqparat» HAA-nyń menshikti tilshisi.
Aıta keteıik, búgin Qyrǵyzstanǵa 9 tamyz kúni Sholpan atada bolatyn EAEO elderiniń úkimet basshylary kezdesýine resmı delegatsııalar keledi. «Eldegi oqıǵalarǵa qaramastan, Eýrazııa úkimetaralyq keńesi belgilengen ýaqytynda ótedi», - dep málimdedi Qyrǵyz Respýblıkasy premer-mınıstriniń baspasóz hatshysy Ádilet Sultanalıev.
Atambaevty arnaıy ustaý sharasy Ystyqkóldegi týrızm maýsymynyń qyzǵan shaǵynda iske asyrylýda. Osyǵan oraı Qyrǵyzstan týrızm departamentiniń dırektory Maksat Damır ýýlý týroperatorlarǵa úndeý tastady:
«Eger sizderde Bishkek aýmaǵynda qaýipsizdigin qamtamasyz etý qajet týrıster toby bolsa, maǵan habarlasyńyzdar... Jol qozǵalysy qaýipsizdigin qamtamasyz etý bas basqarmasymen birge ony uıymdastyrýǵa áreket jasaımyz», - dedi ol.
Bishkek ishki ister bas basqarmasynyń málimdeýinshe, Bishkek mılıtsııasynyń jeke quramy azamattar men astana qonaqtarynyń qoǵamdyq qaýipsizdigin qamtamasyz etý qyzmetin shtattyq rejımde oryndap otyr. Qazirgi kezde qaladaǵy jaǵdaı qalypty, mılıtsııa qyzmetkerleriniń baqylaýynda.
Avtor: Natalıa Gılt
Foto: kabar.kg
