Qyrǵyzstan álemdik qoǵamdastyqtan Q.Bakıevtiń shottaryn jabýdy ótinýde

Bul shara, 2010 jyldyń sáýir aıynyń basynda eki táýliktiń ishinde eldiń alty kommertsııalyq bankinen 200 mıllıon dollardyń shyǵarylýymen baılanysty, dep habarlaıdy RBK agenttigi.

Ýaqytsha úkimet basshysynyń orynbasary Temir Sarıevtiń aıtýynsha, aldyn-ala málimetter boıynsha, qarjy amerıkandyq bankterdiń birinde jatyr. Bul másele AQSh Memlekettik hatshysynyń kómekshisimen talqylanǵan. Ýaqytsha úkimet, eks-prezıdent Q.Bakıevtiń tóńiregindegilerdiń bul qarjyny lańkestik áreketter uıymdastyrý úshin paıdalanýy múmkin ekenin habarlap otyr.

Qyrǵyzstanda tóńkeristen keıin burynǵy prezıdent Q.Bakıevtiń ústinen Bishkekte sáýirdiń 7-sinde bolǵan oqıǵalar kezinde adam óltirý faktilerine baılanysty jáne eks-prezıdenttiń óziniń qyzmet jaǵdaıyn asyra paıdalaný epızodtaryna qatysty qylmystyq is qozǵaldy.

Esterińizge sala keteıik, Qyrǵyzstannyń quqyq qorǵaý organdary taǵynan taıdyrylǵan Q.Bakıevtiń baýyrlaryn izdestirýdi jalǵastyrýda. Eldiń burynǵy basshysy men onyń aınalasyndaǵylarǵa sybaılas jemqorlyq, jýrnalıster men saıasatkerlerdi óltirý faktileri boıynsha kúdikter keltirilýde. 200-den astam qylmystyq is qozǵalyp otyr. Eldi tastap shyqqan jáne qyzmetten otstavkaǵa ketken Q.Bakıev, ózine jáne aınalasyndaǵy azamattarǵa taǵylǵan aıyptardy teriske shyǵaryp otyr.