Qyrǵyzstan: A/H1N1 tumaýymen baılanysty jaǵdaı jiti baqylaýda
BІShKEK. Qarashanyń 6-sy. QazAqparat /Evgenıı Novıkov/ - Qarashanyń 6-syndaǵy jaǵdaı boıynsha Qyrǵyzstanda A/H1N1 tumaýynyń 17 oqıǵasy tirkeldi. Respýblıkadaǵy epıdemıologııalyq jaǵdaı, sondaı-aq vırýspen kúresý sharalary týraly QazAqparat tilshisine Qyrǵyz Respýblıkasy Memlekettik sanıtarlyq-qadaǵalaý departamentiniń bas mamany Dınagúl Otorbaeva áńgimelep berdi.
- Dınagúl Satarqyzy, Qyrǵyzstandaǵy «dońyz tumaýymen» baılanysty aqýal qalaı?
- Búgingi kúngi jaǵdaı boıynsha bizde 17 naýqas tirkelip otyr. 16 jaǵdaıda vırýs syrt elderden ákelingen. Atap aıtqanda, qarashanyń 2-sinde Máskeý-Bishkek poıyzymen kelgenderdiń ishinde búginde 12 naýqas anyqtalyp otyr. Bizge Qoıyndy stansysynan qońyraý shalynyp, tumaý jáne tynys jolynyń jiti vırýsy belgilerimen naýqastardyń bar ekeni habarlandy. Oqıǵa ornyna baryp kelgen ınfektsıonıster men vırýsologtar dıagnozdy rastady.
11 naýqastyń 10-y respýblıkalyq klınıkalyq aýrýhanaǵa jatqyzyldy. Eki balasy bar bir áıel aýrýhanaǵa jatýdan bas tartty jáne ol turatyn jeri boıynsha emhananyń baqylaýyna tapsyryldy. Biraq keıinnen áıeldiń balalarynan da vırýs belgileri anyqtaldy.
Qarashanyń 4-inde Novokýznetsk-Bishkek poıyzy kelip, onda da zerthanalyq jolmen rastalǵan eki oqıǵa anyqtaldy. Taǵy bir naýqas boıjetken, Qyrǵyzstan azamatshasy el aýmaǵynda anyqtaldy.
- Qalyptasqan epıdemıologııalyq ahýalǵa baılanysty qandaı sharalar qabyldanyp jatyr?
- Qazirgi ýaqytta indettiń taralýyna jol bermeý maqsatynda Bishkekte jáne jalpy respýblıka boıynsha naýqastardy anyqtaý jónindegi sharalar kúsheıtilýde. Ásirese, respýblıkaǵa syrttan kelýshilerge nazar aýdarylýda. Qazaqstan-qyrǵyz shekarasynda, «Aq Jol» tekserý-baqylaý beketinde tumaýdyń belgilerin anyqtaýǵa múmkindik beretin teplovızor ornatylǵan. Osyndaı apparatýra «Manas» jáne Osh áýejaılarynda bar. Biz teplovızorlar jetkizilimine qosymsha tapsyrystar berdik jáne qajet bolǵan jaǵdaıda, olardy shekaradaǵy beketterge ornatýdy josparlap otyrmyz.
D.Otorbaevanyń aıtýynsha, bir sózben aıtqanda, jaǵdaı jiti baqylaýda. Barlyq naýqastar em qabyldap jatyr. Aýyr oqıǵalar joq.
