Qyrǵyzstan 29 tamyzda Máskeýdegi órtte qaza bolǵan azamattary úshin aza tutý kúnin jarııalady
ASTANA. QazAqparat - Qyrǵyzstan Prezıdenti Almazbek Atambaev dúısenbi kúni, 29 tamyzdy Máskeýdegi baspahanadaǵy órt kezinde respýblıkanyń 14 azamaty qaza bolýyna baılanysty aza tutý kúnin jarııalady, dep habarlady RIA Novostı.
Órt senbi kúni tańerteń Máskeýdiń soltústiginde Altýfev tasjoly, 5-úıde boldy. Shuǵyl qyzmetterdegi derekkózdiń málimetteri boıynsha, órtke oranǵan ǵımarat «Pechatnyı ekspress» baspahanasyniki bolyp shyqty. Barlyǵy 17 adam qaza boldy, olardyń 14-i - Qyrǵyzstan azamattary.
«Prezıdent dúısenbi kúni, 29 tamyzda qaza bolǵandar úshin aza tutý kúnin jarııalaýǵa pármen berdi», dep habarlaıdy qyrǵyz bıligi.
QR Prezıdentiniń jarlyǵyna sáıkes elde memlekettik týlar tómen túsirilip, oıyn-saýyq sharalary toqtatylady.
A.Atambaev úkimetke órt kezinde qazaǵa ushyraǵan jáne zardap shekken adamdardyń otbasylaryna barynsha kómek kórsetý jóninde nusqaý berdi.
