Qyrǵyzdyń tártip saqshylary Qazaqstan halyqaralyq izdeý jarııalaǵan azamatshany ustady
ASTANA. Maýsymnyń 2-si. QazAqparat /Aıdar Ospanalıev/ - Mamyrdyń 27-si kúni qyrǵyzstandyq tártip saqshylary Qazaqstannyń Interpol ulttyq ortalyq bıýrosynyń suraýymen halyqaralyq izdeý salynǵan azamatsha Svetlana Kovrıkti qolǵa túsirdi.
Bul týraly búgin jýrnalıstermen bolǵan brıfıngte Іshki ister mınıstrliginiń til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, atalmysh azamatsha Qyrǵyzstan astanasynyń «Manas» áýejaıynda qolǵa túsken. Azamatshany Ekonomıkalyq qylmysqa jáne sybaılas jemqorlyqqa qarsy kúres agenttiginiń Qaraǵandy oblystyq departamentiniń ókilderi jalǵan kásipkerlik pen zańsyz qarjyny zańdastyrǵany úshin izdep júrgen bolatyn. «Qazirgi tańda ony elge ekstradıtsııalaý maqsatynda arnaıy qujattar daıyndalyp, olar Qyrǵyzstanǵa jiberilmek», dedi departament bastyǵy.
Sonymen qatar ol mamyr aıynda Shyǵys Qazaqstan oblystyq tártip saqshylary Rıdder qalasynda izdeýde júrgen taǵy bir qylmyskerdiń qolǵa túskendigin jetkizdi. Ustalǵan azamat ótken jyldyń qazan aıynda eldegi jaýapkershiligi shekteýli seriktestikterdiń biriniń basshysynyń kóligine qaraqshylyq shabýyl jasap, kólik ıesine aýyr dene jaraqatyn salyp, onyń 19 myń AQSh dollaryn alyp ketken. «Qazir qaraqshynyń sybaılastaryn ustaý boıynsha sharalar júrgizilýde», dedi Q. Jumanov.
