«Qyrǵyzdar da salyq tólesin!» - respýblıkalyq basylymdarǵa sholý
***
Elorda toıy jaqyn qaldy. Aıbynymyzdy asyryp, abyroıymyzdy tasytqan Astana - jıyrma jyldaǵy jasampaz jumysymyzdyń jarqyn jeńisi. Elorda men Elbasy egiz uǵym ekendigi barshaǵa belgili. Elbasy qamqorlyǵyna bólengen elordanyń erteńi eńseli ekendigi aıdan anyq. Keshe Elbasy Nursultan Nazarbaev kún saıyn kórkeıe túsip kele jatqan elordada salynyp jatqan birqatar qurylys nysandarynda boldy. Sondaı-aq Otanymyzdyń bas qalasynyń «jasyl beldeýin» quraıtyn orman alqabyn baryp kórdi. Memleket basshysy Astana kúni qarsańynda atqarylyp jatqan jumystarǵa oń baǵasyn berip, osy úderisterdi ári qaraı jalǵastyra berýdiń mańyzy zor ekenin atap kórsetti. Bul jaıynda «Egemen Qazaqstan» gazetiniń senbilik sanyndaǵy «Astana ajaryn aıshyqtaǵan» degen taqyryptaǵy maqalada keńinen baıandalǵan.
Qazaqstan dıplomattary úshin bıylǵy kásibı merekeniń ózindik ereksheligi bar. Ol táýelsiz memleketimizdiń Syrtqy ister mınıstrliginiń qurylǵanyna 20 jyl tolýyna tuspa-tus keledi. 1992 jylǵy 2 shildede Qazaqstan Respýblıkasynyń Prezıdenti Nursultan Nazarbaevtyń Jarlyǵymen qurylǵan Syrtqy ister mınıstrligi osynaý tarıhı qysqa merzimniń ishinde Qazaqstannyń syndarly syrtqy saıasatyn tıimdi júzege asyryp, halyqaralyq yntymaqtastyqty jan-jaqty damytyp, álem memleketterimen aradaǵy ózara qarym-qatynastyń berik te senimdi júıesin qurdy. Osy ataýly merekege oraı «Egemen Qazaqstan» gazetinde Syrtqy ister mınıstriniń orynbasary Qaırat Sarybaımen aradaǵy suhbat «Eń basty jeńisimiz - memlekettik til» degen taqyryppen berilgen.
***
«Senat depýtaty Ikram Adyrbekov Qazaqstanda jumys istep júrgen Qyrǵyzstan azamattaryna salyq salýdy engizý týraly oryndy usynys aıtty», - dep jazady «Aıqyn» gazeti búgingi sanyndaǵy «Qyrǵyzdar da salyq tólesin!» degen taqyryptaǵy maqalasynda. Basylymnyń atap ótýinshe, budan bylaı qyrǵyzdardyń Qazaqstan aýmaǵynda úsh aıǵa deıin turyp, jumys isteýge quqy bar. Kerisinshe, qazaqtar Qyrǵyzstanǵa osyndaı merzimge kedergisiz kire alady. Jaqyn arada Qazaqstan men Qyrǵyzstan úkimeti arasynda eki el azamattaryna kórshi memlekettiń aýmaǵyna 90 kúnge deıin vızasyz kirý týraly kelisim jasalmaq. Bul usynystyń mehanızmderi durys jasalsa memleket bıýdjetine qomaqty qarjy túsetin bolady. Іshki ister mınıstrliginiń málimetteri boıynsha, byltyr Qazaqstanǵa 94 myń qyrǵyz azamaty kelgen, al bizden Qyrǵyzstanǵa barǵandar 3 myń ǵana eken.
***
«2017 jyly «EKSPO» kórmesin ótkizýge nıetti Qazaqstan - álemdik qoǵamdastyqqa «Bolashaq energııasy» taqyrybyn usynǵany belgili. Tańdap alǵan taqyryptyń mańyzyn taǵy bir talqylap, ony álemge tanyta túsý úshin Astanada «Bolashaq energııasy. Ǵalamshardyń turaqty damýy» atty halyqaralyq sımpozıým ótti. Sımpozıýmǵa 160 eldiń 150-ge jýyq delegattary qatysty», - dep jazady «Astana aqshamy» gazeti «Bolashaq energııasy» - tyń bastama» degen taqyryptaǵy maqalasynda. «Álem boıynsha energetıka salasyndaǵy keshendi máseleni sheshý - energetıkalyq balansty balamaly qýat kózderimen tolyqtyrýǵa tikeleı baılanysty», deıdi ǵalymdar. Ásirese, elimizdiń geografııalyq jaǵdaıy jel, kún jáne sý energııasyn molynan paıdalanýǵa múmkindik beredi. Qazaqstan saǵatyna 1 trln kv energııa óndirýge múmkindigi bar. Alaıda, qazir iske qosylǵan tórt stantsııa nebári 10 megavatt qana energııa óndiredi. Bul rette álemdik qaýymdastyqqa «EKSPO»-ny ótkizý úshin «Bolashaq energııasy» taqyrybyn usynǵan Qazaqstan tek elde ǵana emes álemdegi eń ózekti, tipten ómirlik mańyzy bar máseleni kóterip otyr. Sımpozıým barysynda sondaı-aq klımattyń ózgerýi, bolashaqtaǵy energııa men ekologııa qaýipsizdigi jáne balamaly energııa kózderin jetildirý men turaqty damytý jobalaryn qarjylandyrý máseleleri talqyǵa tústi.
***
«Ekspress K» gazetiniń jazýynsha, laýazym satý Qazaqstanda eń tabysty bıznes túrine aınalyp otyr. Bul rette sóz tek qana zor sheneýniktiń jumsaq kreslosy jaıynda bolyp otyrǵan joq. El azamattary tipti kúzetshi ne bolmasa balabaqshanyń tárbıeshisi bolyp ornalasý úshin de para berýden ket ári emes. Máselen, 2010-2012 jyldary jumysqa ornalasý úshin para berý 21 qylmystyq istiń qozǵalýyna túrtki bolǵan. Al qarjy polıtsııasynyń quryǵyna ilinbegen mámlilerdiń sany qansha ekendigi bir Allaǵa ǵana aıan. Maqala «Takıe kresla Ostapý Benderý ı ne snılıs» degen taqyryppen berilgen.
