Qyrǵyz Jogorký Keneshi: Qazaqstanǵa álemdik qoǵamdastyq tarapynan joǵary senim bar

ASTANA. QazAqparat - QR Prezıdentiniń bastamalary Qazaqstannyń halyqaralyq arenadaǵy bedelin nyǵaıtty. Búgin Astanada QR Tuńǵysh Prezıdenti kúnine arnalǵan halyqaralyq parlamenttik konferentsııada Qyrǵyz Respýblıkasynyń Jogorký Keneshi tóraǵasynyń orynbasary Ásel Kodýranova aıtty, dep habarlaıdy QazAqparat tilshisi.

«Qyrǵyz Respýblıkasynyń Jogorký Keneshi atynan qazaqstandyqtardy aldaǵy kele jatqan QR Tuńǵysh Prezıdenti kúnimen quttyqtaımyz. Biz Qazaqstan halqynyń órkendeýine tilektespiz.  Bizdiń elimiz Qazaqstannyń tabystary men jetistikteri týraly jaqsy biledi. Álemdik reıtıngterde aldyńǵy qatarly oryndarǵa qaraı belsendi ilgerlep, halyqaralyq arenada mańyzdy oıynshylardyń birine aınaldyńyzdar», - dedi Ásel Kodýranova.

Qazaqstannyń jahandyq bastamalary álemdik qoǵamdastyq tarapynan qoldaýǵa ıe bolǵanyna toqtalǵan ol, bul óz kezeginde eldiń halyqaralyq bedelin nyǵaıta túskenin jetkizdi.

«Atap aıtqanda, Qazaqstannyń BUU Qaýipsizdiń keńesinde turaqty emes múshesi mártebesin alýy elderińizge álemdik qoǵamdastyq tarapynan joǵary senim bar ekenin kórsetti. Ortalyq Azııa memleketteri arasynda birinshi bolyp osy bedeldi uıymda qyzmet ettińizder», - dedi Ásel Kodýranova.

Budan buryn habarlanǵandaı, búgin Astanada QR Tuńǵysh Prezıdenti kúnine arnalǵan «Astana - jahandyq ıntegratsııa, qaýipsizdik jáne beıbitshilik ortalyǵy» taqyrybynda halyqaralyq parlamenttik konferentsııa bastaldy. 

Konferentsııa barysynda Ózbekstan Olıı Majlısiniń spıkeri Nýrıdjon Ismoılov Elbasy maqalasyna qatysty pikir bildirdi

Sonymen qatar, Túrkııanyń Uly Ulttyq jınalysy tóraǵasynyń orynbasary Mýstafa Shentop Elbasynyń «Uly dalanyń jeti qyry» maqalasy týraly óz oıyn aıtty.