Qyrǵyz úkimetiniń basshysy Máskeýdegi taksı qaǵyp ketkenderdi Qyrǵyzstanǵa demalýǵa shaqyrdy
BІShKEK. QazAqparat - Qyrǵyzstannyń Premer-mınıstri Muhammedkalyı Abylǵazıev Máskeýde qyrǵyzstandyq júrgizýshi qaǵyp ketip zardap shekkenderdi Qyrǵyzstanǵa demalýǵa shaqyrdy, dep habarlaıdy Kabar agenttigi.
Muhammedkalyı Abylǵazıev Qyrǵyzstan Respýblıkasynyń Іshki ister mınıstri Qashqar Djýnýshalıevpen kezdesti. Olar Máskeýde qyrǵyzstandyq júrgizýshi kóligimen jol shetindegi bir top adamdy qaǵyp ketkeni jóninde oqıǵany talqylady.
«16 maýsym kúni Máskeýdiń ortalyǵynda otandasymyz Chyngyz Anarbek ýýlý jaıaý júrginshilerdi kóligimen qaǵyp ketti. Jol-kólik oqıǵasynan birneshe adam zardap shekken, olardyń qatarynda fýtbol jankúıerleri de bar. Bul - óte qaıǵyly oqıǵa, degenmen ol qasaqana jasalmaǵan», - dedi Abylǵazıev.
Abylǵazıev jaqynda Reseıge sol eldiń Іshki ister mınıstri Vladımır Kolokoltsevpen kezdesýge attanǵaly jatqan Qashqar Djýshýnalıevke zardap shekken naýqastardyń jaǵdaıyn bilip qaıtýdy tapsyrdy.
«Bolǵan jaıt Reseı Federatsııasynda jumys jasap júrgen jerlesterimizge eshqandaı kesirin tıgizbeýi kerek. Bul - jazataıym oqıǵa. Qyrǵyz Respýblıkasy Úkimetiniń atynan kólik qaǵyp ketken adamdardan keshirim suraımyn jáne Qyrǵyzstanǵa demalyp, em qabyldaýǵa shaqyramyn. Bizde densaýlyqty qalypqa keltirip, keremet demalý úshin barlyq jaǵdaı jasalǵan. Zardap shekkenderdiń ushyp kelýi men demalysyn uıymdastyrýǵa qajet barlyq shyǵyndy óz moınymyzǵa alýǵa daıynbyz», - dedi qyrǵyz Úkimetiniń basshysy.
Sondaı-aq, Abylǵazıev Іshki ister mınıstrine Chyngyz Anarbek ýýlýmen kezdesip, bilikti zańgerdiń qyzmetin usyný máselesin sheshýdi tapsyrdy.
