Qyrǵyz úkimeti jerde uıyqtaǵan balany izdep jatyr
ASTANA. QazAqparat - Qyrǵyz Prezıdenti Almazbek Atambaev áleýmettik jelilerde keń tarap, qyzý talqylanyp jatqan sýrettegi balanyń jaǵdaıyn zertteýdi tapsyrdy. Onda boljam boıynsha Osh qalasyndaǵy Qara-Cýý bazarynyń aýmaǵynda balaqaı konteınerdiń astynda uıyqtap jatyr, dep habarlaıdy knews.kg.
Prezıdent apparatynyń jetekshisi Farıd Nııazov bul tapsyrmany úkimetke, vıtse-premer-mınıstr Gúlmıra Qudaıberdıeva men Osh oblysy úkimetiniń ýákiletti ókili Taalaıbek Sarybashevke júktedi.
«Úkimet balany taýyp, oǵan qamqor bolady. Sonymen qatar, memleket basshysynyń tapsyrmasyna sáıkes, eldiń bazarlaryndaǵy balalarǵa qatysty jaǵdaılardy jiti tekserý kerek», - delingen habarlamada.
Eske sala keteıik, osyǵan deıin K-News áleýmettik jelilerde talqylanyp jatqan sýretti jarııalady. Kishkentaı ul bala konteınerler janynda jerge tóselgen karton qaǵaz ústinde uıyqtap jatqan. Jeli belsendileriniń aıtýynsha, bul sýret Oshta Qara-Sýý bazarynda túsirilgen.
