Qyrǵyz Úkimeti apparatynyń 26 qyzmetkerinen koronavırýs tabyldy
«Saraptama qorytyndysynda 26 qyzmetkerden koronavırýs ınfektsııasy tabylyp otyr. Osydan eki kún buryn 11 adamnan vırýs tabylǵan edi. COVID-19-ǵa qaıta jasalǵan saraptama barysynda taǵy vırýs 15 qyzmetkerden tabyldy. Olardyń arasynda Premer-Mınıstrdiń keńesshileriniń biri Artem Novıkov pen Úkimet basshysynyń kómekshisi bar. Úkimet apparatynyń jetkshisi - mınıstr Taalaıbek Temirálıev baılanysta bolǵan adam retinde qazirgi ýaqytta oqshaýlanǵan», - delingen taratylǵan aqparatta.
Sanıtarlyq-epıdemıologııalyq is-sharalar algorıtmine sáıkes, olardyń barlyǵy da úı karantınine jiberilip, tıisti em alyp jatyr. Olardyń basym bóliginde aýrý sımptomsyz ótip jatyr. Vırýs juqtyrǵandarmen baılanysta bolǵan adamdar da anyqtalǵan. Qyrǵyz Respýblıkasy Úkimeti apparaty qyzmetkerleriniń basym bóligi qashyqtan jumys isteýin jalǵastyryp jatyr.
Buǵan deıin Qyrǵyz Prezıdenti apparatynyń 17 qyzmetkerinen jáne Memleket basshysy apparatynyń jetekshisi Dosaly Esenalıevten koronavırýs tabylǵany habarlanǵan bolatyn.
27 maýsym kúni Qyrǵyzstanda koronavırýs juqtyrýdyń 309 jaǵdaıy tirkelgen. Búginde bul elde COVID-19-ben 4 513 adam aýyrdy. Onyń ishinde 2 212 adam jazylyp, aýrýhanalardan shyǵarylsa, qaza tapqandardyń sany 46 adamǵa jetip otyr.
Esterińizge sala ketsek, 24 maýsymda Máskeýde Qyrǵyzstan prezıdenti Sooronbaı Jeenbekovtiń qasynda birge júrgen eki adamnyń koronavırýsqa tapsyrǵan analızi oń nátıje bergen edi.
Osyǵan baılanysty Qyrǵyzstan prezıdenti Jeńistiń 75 jyldyǵyna arnalǵan sharaǵa qatysýdan bas tartqan bolatyn.
