Qyrǵyz Úkimet basshysy prezıdenttikke kandıdat retinde usynyldy
ASTANA. QazAqparat - Qyrǵyzstannyń sotsıal-demokratııalyq partııasy (QSDP) búgin Bishkekte ótken sez barysynda qazirgi premer-mınıstr Sorronbaı Jeenbekovtiń kandıdatýrasyn Qyrǵyzstan Respýblıkasynyń prezıdenttigine usyný týraly sheshimdi jarııa etti, dep habarlaıdy QazAqparat kabar.kg saıtyna silteme jasap.
Daýys berý qorytyndysyna sáıkes, Sorronbaı Jeenbekovtiń kandıdatýrasy úshin sezdiń 674 delegaty biraýyzdan daýys berdi.
Sez sheshimi boıynsha, QSDP Sorronbaı Jeenbekovti partııanyń atynan prezıdent saılaýyna túsetin jalǵyz úmitker retinde tańdady.
Óz kezeginde, Jeenbekov osyndaı qoldaý úshin alǵys aıtyp, oǵan artylǵan senimdi aqtaýǵa bar kúsh-jigerin salatynyn jetkizdi.
Aıta keteıik, Qyrǵyzstanda prezıdent saılaýy aǵymdaǵy jyldyń 15 qazany kúni ótedi. Qazirgi tańda prezıdent saılaýyna qatysýǵa Qyrǵyzstannyń 26 azamaty nıet bildirgen.
