Qyrǵyz túrkology: Qazaqstan Prezıdenti babalar órkenıetine laıyq bolýǵa shaqyryp otyr

ASTANA. QazAqparat - Qyrǵyzstandyq belgili túrkolog, Halyqaralyq Túrki akademııasynyń ǵalymy Qadyráli Qońqabaev QR Prezıdenti Nursultan Nazarbaevtyń «Uly dalanyń jeti qyry» atty maqalasyna qatysty pikirin bildirdi, dep habarlaıdy QazAqparat tilshisi.

«Túrkolog degen bir top ǵalym bar. Sol ǵalymdardyń armany oryndaldy dep qýanyp jatyrmyz. Sebebi, túrki elderiniń 2-3 myń jyldyq tarıhyna, túrki elderiniń túpki mádenıeti men etnogenezine, olardyń jaratqan órkenıetterine birde-bir Memleket basshysy mundaı qamqorlyq kórsetken emes. Bul - eń basty sharýa. Ekinshiden, túrki elderiniń órkenıeti - tarıhtyń jol-jónekeı qubylysy emes. Mysaly úshin Elbasynyń aıtyp otyrǵan at mádenıeti, ań stıli, ejelgi metallýrgııa - adamzatty tańdaı qaqtyrarlyq mádenıetter. Kerek deseńiz, Eýropa elderi temirge altyn jáne kúmis jalatýdy 16-17 ǵasyrda ǵana úırengen. Al ata-babalyrymyz temir men qolanyń ústine altyn men kúmisti jalatýdy bizdiń dáýirimizge deıingi ekinshi ǵasyrda meńgerip qoıǵan», - deıdi Qadyráli Qońqabaev.

Tanymal túrkologtyń aıtýyna qaraǵanda, qazirgi Týva Respýblıkasynyń Qyzylsharyndaǵy qorǵannan jeti jarym kelilik altyn tabylǵan.

«Ondaǵy altynnan taqqan hanshanyń monshaǵy úsh jarym keli kórsetken. Ol jerden altynnan jasalǵan báıterek tabylǵan. Endeshe biz atalarymyz jaratqan sol mádenıettiń barlyǵyn jandandyrýymyz kerek. «Arhıv - 2025», menińshe, eń kerek baǵdarlama. Túrki elderiniń mádenıetterin arhıvteý, oqýlyq ortalyqtaryn qurý, mýzeı ashý - túrki elderiniń kelesheginiń qamy. Eger memleket túrki elderiniń murasyn oılamasa, onda ol mádenıettiń eshkimge de keregi joq. Oqymystylar armanyn aıtyp, qııaldap júre berer edi. Ótkenge úńilý, saralaý, sabaq alý - Qazaqstannyń qýatty memleket bolǵanynyń belgisi», - dep túıdi Qadyráli Qońqabaev.

Aıta ketý kerek, búgin QR Prezıdenti Nursultan Nazarbaev «Uly dalanyń jeti qyry» atty maqalasyn jarııalaǵan bolatyn.