Qyrǵyz-tájik shekarasyndaǵy janjal: qosymsha 351 adam evakýatsııalandy
«2019 jylǵy 24 shildede Aqsaı aýylynan Batken qalasyna qosymsha 351 adam kóshirildi. Úkimet 2019 jylǵy 23 shilde kúni keshke Batken oblysynda tótenshe jaǵdaı jarııalady», - dedi B. Asanova.
Onyń aıtýynsha, 23 shildede Qyrǵyz Respýblıkasynyń Qyzyl Jarty Aı Ulttyq Qoǵamy 1,5 myń lıtr bótelkedegi sý, 274 adamǵa arnalǵan tańǵy as pen túski tamaq bóldi; sondaı-aq, qosymsha 300 adamǵa túski as berildi. Evakýatsııalanǵandar úshin eki jerde (№57 lıtseı men medrese) balalar men áıelderge arnalǵan psıhoáleýmettik qoldaý boıynsha sharalar uıymdastyryldy.
Asanova aıtqandaı, búgin, 2019 jylǵy 24 shildede, Qyzyl Jarty Aı Qoǵamy taǵy da bótelkedegi sý taratyp, otbasylar men evakýatsııalanǵan turǵyndarǵa 5 jerde psıhoáleýmettik qoldaý kórsetip jatyr. Budan bólek Lenın atyndaǵy mektepte 50 adamǵa arnalǵan tańǵy as taratyldy.
Eske sala ketsek, budan buryn qyrǵyz-tájik memlekettik shekara ýchaskesinde qarýly qaqtyǵys týyndap, janjalǵa Vorýh (Tájikstan Respýblıkasy) aýylyndaǵy turǵyndardyń eldi mekenniń kire berisine flagshtok ornatýy sebep bolǵandyǵy habarlanǵan bolatyn.
Al, keshe tańerteń qyrǵyz-tájik shekarasyndaǵy atys toqtap, jaǵdaı turaqtala bastaǵandyǵy málimdeldi.
Atys bolǵan ýchaskedegi shekaralyq bólimsheler kúsheıtilgen qyzmet rejımine kóshirilgen.
Sondaı-aq, keshe shekara mańynda turatyn halyqpen túsindirý jumystaryn ótkizý kezinde Tájikstan tarapynan Qyrǵyzstan azamatyna eki ret oq atylǵan. Sonyń saldarynan QR Shekara qyzmetiniń áskerı qyzmetkeri jaralandy. Kezdesýge Qyrǵyz Respýblıkasy Memlekettik shekara qyzmetiniń tóraǵasy Ýlarbek Sharsheev, Qyrǵyzstan bıliginiń Batken oblysyndaǵy ókiletti ókili Akram Madýamarov qatysqan.