Qyrǵyz-tájik shekarasyndaǵy qaqtyǵysqa turmystyq daý-damaı sebepker boldy
Aıta keteıik, mamyrdyń 7-sinen 8-ine qaraǵan túnde qyrǵyz-tájik shekarasynyń Batken aýdanynda eki el azamattarynyń qatysýymen qaqtyǵys bolyp, qyrǵyz jaǵynan keminde 20 adam zardap shekken bolatyn. Tájikstan jaǵynan qansha adam zardap shekkeni týraly dárekter ázirge joq.
Qyrǵyz ІІM habarlaýynsha, 7 mamyr kúni keshke Tájikstanmen aradaǵy shekarada tájikstandyqtar men qyrǵyz azamattarynyń arasynda daý týyp, olar bir-birin taspen atqylaǵan. Osydan bastalǵan tolqýlarǵa eki jaqtan myń jarymdaı adam qatysyp, qyrǵyz shekarasy jaǵynda janarmaı quıý stansasy, dúken jáne júk kólikteri órtelgen.
Tóbelesti eki eldiń shekarashylary men quqyq qorǵaý organdary birge toqtatýǵa kúsh saldy. Oqıǵanyń órship ketýin aldyn alý maqsatynda olar aspanǵa oq atqan.
Shekarashylar eki jaqty tek 8 mamyrdyń túngi saǵat 3 kezinde ǵana tynyshtandyryp, qaqtyǵysty toqtatqan. Qazirgi ýaqytta qyrǵyz-tájik shekarasyndaǵy jaǵdaı birqalypty, Batken-Isfana baǵytyndaǵy kólik qozǵalysy qalpyna keltirildi. Shekara mańyndaǵy aýyldarda quqyq qorǵaý organdarynyń qyzmetkerleri túsindirý jumystaryn júrgizýde. Oqıǵa ornyna Qyrǵyz Respýblıkasynyń ishki ister mınıstriniń orynbasary Qursan Asanov keldi.
Aıta ketý kerek, mundaı oqıǵa Qyrǵyzstan men Tájikstan shekarasynda birinshi ret oryn alyp otyrǵan joq. Mundaı jaǵdaıdyń negizgi sebebi eki el arasyndaǵy shekaradaǵy delımıtatsııa jáne demarkatsııa jumystarynyń áli de bolsa tolyq bitpegeni.