Qyrǵyz-tájik shekarasyndaǵy atys toqtady
NUR-SULTAN. QazAqparat - Qyrǵyz-Tájik memlekettik shekarasyndaǵy jaǵdaı salystyrmaly túrde alǵanda turaqtandy, dep habarlaıdy QazAqparat.
Batken oblysynda ornalasqan shekara bólimsheleri kúsheıtilgen rejımde qyzmet atqarýda. Qyrǵyz-tájik memlekettik shekarasyndaǵy ótkizý beketteri shtattyq rejımde jumys istep jatyr.
Tájikstan men Qyrǵyz respýblıkalarynyń quqyq qorǵaý organdarynyń birlesken tergeý toby qaqtyǵystyń sebepteri men mán-jaıdy anyqtaý maqsatynda tergeý júrgizbek.
Qyrǵyzstannyń «Kabar» agenttiginiń habarlaýynsha, Batken oblysyndaǵy memlekettik shekaranyń qyrǵyz-tájik ýchaskesindegi kúsh qurylymdary bólimsheleriniń is – qımyldaryn Bas shtab bastyǵy-Qyrǵyz Respýblıkasynyń Memlekettik shekara qyzmeti tóraǵasynyń birinshi orynbasary polkovnık Ábdikárim Álimbaev úılestiredi.
Qyrǵyz Respýblıkasynyń memleketik shekara qyzmetiniń málimetinshe, qańtardyń 9-ynan 10-yna qaraǵan túni saǵat 00:40-ta Batken oblysy Batken aýdany Jaqa-Órýk jerinde belgisiz bireýler Batkenge bara jatqan Qyrǵyzstan azamatyna tıesili kólikke tas laqtyrǵan. Olar Tájikstan aýmaǵynda jasyrynǵan. Qyrǵyz Respýblıkasynyń quqyq qorǵaý organdarynyń aqparaty boıynsha, kólikte bolǵan Qyrǵyzstannyń azamattary zardap shekken. Shamamen bir saǵattan keıin Tájikstannyń Kocho-Karyn eldi mekenindegi azamattar Batkennen Kók-Tash aýylyna bara jatqan Qyrǵyzstannyń basqa azamatynyń kóligine tas laqtyrǵan. Shamamen 2 saǵat 40 mınýtta Tájikstan azamattary Dahma jerinde Qyrǵyzstan azamatynyń úıine tas laqtyrǵan. Shekarashylar quqyq qorǵaý organdarynyń ókilderimen birlesip Qyrǵyzstan azamatynyń úıine bara jatqanda olarǵa Tájikstan tarapynan usaq kalıbrli ańshy myltyǵynan oq atylǵan.
Tájikstannyń UQK Shekara áskerleriniń baspasóz ortalyǵyna silteme jasaǵan «Hovar» tájik aqparat agenttiginiń habarlaýynsha, 2020 jyly 9 qańtarda keshke Batken aýdany Aqsaı aýyldyq keńesiniń Kóktosh aýyly turǵyndarynyń úlken toby ańshy qarýymen qarýlanyp, Qyrǵyzstan azamaty Abdýlaev Sultanbek Ismaılulynyń úıiniń mańynda jınalyp, Isfara qalasy Chorkýh aýyldyq keńesiniń Somonıen aýylynyń jolynda tájik azamattarynyń júrip ótýine kedergi keltirgen.
