Qyrǵyz-tájik shekarasynda taǵy da atys boldy
Qyrǵyzstan memlekettik shekara qyzmetiniń habarlaýynsha, búgin qyrǵyz-tájik shekarasyndaǵy Batken oblysy Batken aýdany Moınaq degen jerde Tájikstannyń «Vorýh» anklavynyń turǵyndary Qyrǵyzstan aýmaǵynda mal jaımaq bolǵan. Shekara jasaǵy osy áreketke jol bermegen.
Tájik tarapynan beımálim adamdar qyrǵyz shekarashylaryna oq atqan. Sosyn shamamen saǵat 11:40 kezinde eki el shekarashylary bir-birimen atysqan.
Qyrǵyzstan tarapynan zardap shekkender joq. Saǵat 12:20 shamasynda eki eldiń shekara qyzmetiniń ókilderi oqıǵa ornynda kezdesti. Qazirgi tańda shekaradaǵy jaǵdaı birshama turaqty. Taraptar jaǵdaıdyń mán-jaıyna kóz jetkizý úshin jumys júrgizip jatyr.
Al, Tájikstan shekara qyzmetiniń málimetinshe, buryn qol qoıylǵan kelisimge qaramastan tańǵy saǵat 10:30-da qyrǵyz malshylary Qyrǵyzstannyń Chıchılık aýylymen shektesetin Isfara qalasy Vorýh aýyl jamaǵatyndaǵy Pýlı Ofotbrýıa degen jerde Tájikstan aýmaǵyna kirgen. Sóıtip sonda turatyn tájik azamattarymen janjaldasqan. Pýlı Ofotbrýıa aýylynyń turǵyndary qyrǵyz azamattarynyń bul zańsyz áreketine qarsylyq kórsetip, aýyldan tez ketýin talap etedi.
Qyrǵyz tarapy ekijaqty kelisimdi saqtaýdyń ornyna oqıǵa ornyna shekarashylardy jibergen. Olar qarýsyz aýyl adamdaryna oq jaýdyrady. Saldarynan 2001 jyly týǵan qatardaǵy jaýynger Davlater Mıronbekovıch Zoırov aıaǵynan jaralanǵan.
«Qyrǵyz shekarashylarynyń bul provokatsııalyq áreketi memlekettik shekaradaǵy jaǵdaıdy ádeıi qoldan ýshyqtyrý retinde baǵalanady jáne ol Tájikstan shekarasy mańynda turatyn turǵyndardyń jaýap qaıtarýyna ákelip soǵýy múmkin» dep jetkizedi shekara qyzmetiniń málimdemesin Hovar agenttigi.